د مالیې وزارت سرپرست په متحده عربي اماراتو کې له افغان ملي سوداګرو سره په افغانستان کې د سوداګرۍ د ودې او پراختیا په اړه خبرې وکړې
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۱۷ مه نېټه په متحده عربي اماراتو کې له مېشتو افغان ملي سوداګرو سره وکتل.
په پیل کې افغان ملي سوداګرو د خپلو کړنو په تړاو د مالیې وزارت سرپرست ته معلومات ورکړل او له هغه یې وغوښتل چې د دوی ستونزو ته رسېدنه وشي.
همدا شان دواړو لوریو په افغانستان کې د سوداګرۍ په وده او پراختیا او د پانګې په جلبولو هر اړخیزې خبرې وکړې.
د مالیې وزارت سرپرست په متحده عربي اماراتو کې مېشتو افغان ملي سوداګرو ته ډاډ ورکړ، چې د دوی ستونزو ته به د هیواد نافذه قوانینو او امکاناتو ته په کتو سره بشپړه پاملرنه او رسېدنه کوي.
