د مالیې وزارت مشرتابه په کابل پوهنتون کې د دردوونکي پېښې په مناسبت فاتحه واخیسته
د مالیې وزارت نوماند وزیر او سرپرست ښاغلي عبدالهادي ارغندیوال، د لړم میاشتې په ۱۳ مه نېټه د کابل په پوهنتون کې د تېرې ورځې دردوونکي پېښې له کبله د مالیې وزارت له لوري د فاتحې په مراسمو کې ګډون وکړ.
په دې مراسمو کې د مالیې وزارت کارکوونکو د قران عظیم الشان ختم او د تېرې ورځې تروریستي پېښې شهیدانو روح ته د دعا لاسونه لپه کړل، شهیدانو ته یې د فردوس جنت، ټپیانو ته بېړنۍ روغتیا او کورنیو او دوستانو ته یې د الله له درباره د جمیل صبر غوښتنه وکړه.
د مالیې وزارت سرپرست، په روزنیزو او تحصیلي مرکزونو باندي برید په ځانګړي توګه د تېرې ورځې تروریستي پېښه د افغانستان په مظلوم ولس یو ستر جنایت وباله. هغه زیاته کړه، چې پر تحصیلي مراکزو باندي برید د اسلام د سپېڅلي دین او اسلامي شریعت خلاف عمل دی. هغه زیاته کړه، چې د افغانستان دښمنان نه غواړي چې زموږ ولس دي پوهه او سوکاله ژوند ولري. هغه د یوه مسلمان وژل د انسانیت وژل وبلل او د افغانستان خلک یې د جنایت په وړاندي ملي پیوستون ته راوبلل.
