د مالیې وزارت نوماند وزیر او سرپرست د افغانستان لپاره د اروپایي ټولنې له سفیر سره د مخې ښې لیدنه وکړه
د مالیې وزارت نوماند وزیر او سرپرست ښاغلي عبدالهادي ارغندیوال، د وږې میاشتې په ۱ نېټه د افغانستان لپاره د اروپایي ټولنې له سفیر ښاغلي پیري میادون، سره په مالیې وزارت کې د مخې ښې لیدنه وکړه.
په پیل کې د مالیې وزارت سرپرست، د اروپایي ټولنې له سفیر څخه د دوه اړخیزه اړیکو پراخولو او پیاوړي کولو همدا شان په مالي او تخنیکي په ځانګړي توګه په مالي او د زېربنا برخه کې د دې ټولنې له مرستو څخه مننه وکړه.
په افغانستان کې د اروپایي ټولنې سفیر خوښي وښوده، چې یاده ټولنه د امنیت د ټینګښت او ډموکراسۍ پراخولو په برخه کې چې له کبله یې ټول وګړي خپلو اساسي حقونو ته رسیږي ملاتړ کوي.
په دې ناسته کې د مالیې وزارت سرپرست، په عوایدي برخه کې له اداري فساد سره د مبارزې په تړاو معلومات وړاندې کړل او ویې ویل، چې په عوایدي سرچینو کې د روڼتیا تامین د حکومت او نړیوالې ټولنې دوه اړخیزه ژمنه ده، چې موږ په دې برخه کې خپل پروګرامونه په جدي توګه پلي کوو. همدا شان د مالیې وزارت سرپرست، د کرونا ویروس د منفي اغیزو کمېدو او ځان بسیاینې په برخه کې د افغانستان د حکومت په پروګرامونو پاندې هم خبرې وکړې.
د دې ناستې په یوه برخه کې دواړو لوریو د افغانستان په تړاو د ۲۰۲۰ پراختیایي کنفرانس په اړه هم خبرې او د نظرونو تبادله وکړه. د مالیې وزارت سرپرست وویل، چې د افغانستان حکومت د یاد کنفرانس لپاره بشپړ چمتووالی لري او اړوند اساسي سندونه هم چمتو دي، چې د افغانستان له مرسته کوونکو سره شریک شوي دي.
د افغانستان لپاره د اروپایي ټولنې سفیر وویل، چې موږ هم له افغانستان سره له نږدې کار کوو، څو یو بریالی کنفرانس ولرو او له دې لارې د حکومت او نړیوالې ټولنې غوښتنې په ښه توګه عملي شي.
