د مالیې وزارت نوماند وزیر او سرپرست د افغانستان لپاره د امنیتي لیږد ګډې قومندانۍ (CSTC-A) سره د افغانستان دولتي ادارو او سیستکا څخه جوړه د څلور اړخیزې کمېټې په جوړولو خبرې وکړې
د مالیې وزارت نوماند وزیر او سرپرست ښاغلي عبدالهادي ارغندیوال نن د وري میاشتې په ۲۷ مه نېته د ویډیو کنفرانس له لارې د افغانستان لپاره د امنیتي لیږد ګډې قومندانۍ سره د افغانستان د امنیتي ځواکونو د یو شمېر اقلامو په تمویل او د مالیې، ملي دفاع او کورنیو چارو وزارتونو او سیستکا څخه جوړه د څلور اړخیزې ګډې کمېټې د جوړیدو په اړه بحث او د نظرونو تبادله وکړه.
په پیل کې د افغانستان لپاره د امنیتي لیږد ګډې قومندانۍ وویل چې موږ د افغانستان امنیتي ځواکونو تمویل ته ژمن یو او لا زیاتې همغږۍ او اړیکو لپاره د څلور اړخیزې کمېټې د جوړیدو غوښتونکي یو. سیستکا زیاته کړه چې یاده کمېټه به مرسته وکړي څو د افغانستان امنیتي ځواکونو د اقلامو په تمویل کې لا همغږۍ رامنځته شي، همداشان بارو لرو چې د غیر ضروري لګښتونو په برخه کې به څو اړخیزه همکارۍ دوام ومومي څو په راتلوونکي کې د افغانستان حکومت وکولی شي په تدریجي ډول د امنیتي ځواکونو تمویل مالکیت په غاړه واخلي.
د مالیې وزارت سرپرست وویل چې د سیستکا او نړیوالې ټولنې څخه مننه کو چې د افغانستان امنیتي ځواکونه تامینوي او د څلور اړخیزې کمېټې د جوړیدو په برخه کې یې خپله موافقه وښوده. د مالیې وزارت سرپرست د اصلاحاتو راوستلو له لارې د غیر ضروري لګښتونو په کمولو ټینګار وکړ. نوموړي زیاته کړه چې مونږ وکولی شول د خوراکي توکو، نفتي موادو او مراقبت په برخو کې د اصلاحاتو په پلي کیدو سره غیر ضروري لګښتونه په ښه ډول را کم کړو چې له نیکمرغه د یادو لګښتونو کموالی د امنیتي ځواکونو په کاري کیفیت باندې منفي اغیزه نه ده کړې.
د مالیې وزارت سرپرست وویل چې د افغانستان حکومت رهبرۍ سره په همغږۍ اصلاحاتو ته به دوام ورکړو چې ور ور د اصلاحاتو پروسه په ټولو برخو کې زیاته شي.
همداشان دواړو خواو موافقه وکړه چې یاده کمېټه دې د افغانستان امنیتي ځواکونو د شمېر اقلامو تخنیکي او مالي تمویل په اړه بحث وکړي. د مالیې وزارت سرپرست وویل چې د افغانستان لخوا تخنیکي ټیم همکارۍ ته چمتو دی او د افغانستان حکومت رهبرۍ په توافق سره سیستکا سره هر اړخیزې همکارۍ ته چمتو یو.
