د مالیې وزارت نوماند وزیر او سرپرست د ولسي جرګې مالي او بودیجوي کمېسیون ته په ملي بودیجه کې د رامنځته شویو تعدیلاتو او د روان مالي وضعیت په اړه توضیحات ورکړل
د مالیې وزارت نوماند وزیر او سرپرست ښاغلي عبدالهادي ارغندیوال نن د غویې میاشتې په ۲ مه نېټه د ولسي جرګې مالي او بودیجوي کمېسیون په ناسته کې ګډون وکړ او د یاد کمېسیون غړو ته یې په افغانستان کې د کرونا ویرس سره د مبارزې لپاره د بودیجوي تعدیلاتو او د ملي عوایدو راټولیدو په وضعیت توضحات ورکړل.
د مالیې وزارت سرپرست وویل چې د مالي چارو او عامه لګښتونو قانون د ۴۶ مې مادې له هدایت سره سم مالیې وزارت په هیواد کې د کرونا ویرس سره د مبارزې لپاره له عادي او پراختیایې بودیجې څخه د ۵.۱۱ میلیارده افغانو بودیجوي تعدیلاتو وړاندیز ولسمشرۍ عالي مقام ته وکړ چې د یاد مقام له لوري منظور شو. نوموړي زیاته کړه چې له یادو پیسو څخه یو میلیارده ۴۱۸ میلیونه افغانۍ په هرات، نیمروز او کابل ولایتونو کې د کوویډ ۱۹ ناروغانو لپاره د ځانګړو روغتونونو او نورو لومړیتوب لرونکو ساختماني برخو جوړیدو ته، ۲ میلیارده افغانۍ د ولایتونو لپاره او ۱.۷ میلیارده افغانۍ د غنمو د پیر لپاره ځانګړي شوي دي.
ښاغلي ارغندیوال وویل چې نړیوال بانک له افغانستان سره د کرونا ویرس سره د مبارزې لپاره د مرستو ژمنه کړې، د افغانستان حکومت او د یاد بانک له هوکړې سره سم کومې پیسې چې د کرونا ویروس سره د مبارزې لپاره د حکومت له بودیجې څخه لګول کیږي د نړیوال بانک له لوري به د حکومت بودیجې ته بیرته ورکړل شي. په دې اساس موږ کولی شو له هغو پروژو څخه چې تعدیلات شوي بیرته بودیجه ورته ځانګړې کړو.
د مالیې وزارت سرپرست وویل دا چې کرونا ویروس یوه نوی پدیده ده او د ۱۳۹۹ مالي کال په ملي بودیجه کې ورته وړاندوینه نه ده شوی مالیې وزارت د قرنطین په ورځو کې په عادي بودیجه کې ۱.۷ میلیارده افغانۍ سپما کړې او کرونا ویروس سره د مبارزې لپاره یې ځانګړې کړې ده. همداشان ۳.۴۱ میلیارده افغانۍ د ادارو اختیاري پراختیایې پروژو او د احتیاط کودونو څخه تنقیص شوي دي.
ښاغلي ارغندیوال وویل چې په هیواد کې د کرونا ویروس خپریدل په ملي عوایدو هم منفي اغیزه کړې، تر دې مهاله مالیې وزارت ۶۰.۱ میلیارده افغانۍ عواید راټول کړي دي چې د ټاکل شوي هدف په نسبت ۱۸ سلنه کسر ښیې. نوموړي د قرنطین په ورځو کې هیواد ته د وارداتو کموالی، د خصوصي سکټور د فعالیتونو دریدل او د دولتي ادارو رخصتي په ملي عوایدو کې د کموالي ستر دلیلونه یاد کړل.
همداشان د ولسي جرګې د مالي او بودیجوي کمېسیون د غړو له لوري په ملي بودیجه کې د رامنځته شویو تعدیلاتو، د ملي عوایدو راټولیدو، له فساد سره د مبارزې او ګمرکي اصلاحاتو په اړه پوښتنې او نظریات وړاندې شول چې د مالیې وزارت رهبرۍ له لوري ورته ځوابونه وویل شول.
د مالیې وزارت سرپرست وویل چې ټاکل شوی ده په عادي او پراختیایې بودیجه کې نور تعدیلات هم راشي چې د منظورۍ لپاره به ملي شورا ته ولیږدول شي. نوموړي زیاته کړه هغه پوښتنې او نظریات چې د ملت استازي یې د مالیې وزارت په اړه لري په لیکلي بڼه دې را ولیږي او موږ یې ځواب ویلو ته ژمن یو.
