د مالیې وزارت نوماند وزیر او سرپرست په افغانستان کې د اسلامي همکاریو سازمان له سفیر او دایمي استازي سره په دوه اړخیزه همکاریو بحث وکړ
د مالیې وزارت نوماند وزیر او سرپرست ښاغلي عبدالهادي ارغندیوال، د تلې میاشتې په ۸ مه نېټه په افغانستان کې د اسلامي همکاریو سازمان له سفیر او دایمي استازي ښاغلي حسین افني بوتسالي، سره په مالیې وزارت کې ولیدل.
په دې لیدنه کې دواړو لوریو د افغانستان او اسلامي همکاریو سازمان ترمنځ د دوه اړخیزه همکاریو په لا پراخېدو، له افغانستان سره د یاد سازمان د مرستو، د سولې پروسې په برخه کې په همکاریو، سیمه ایز اتصال، د اسلامي هیوادونو ترمنځ د همکاریو په پراخېدو، د افغانستان لپاره د ۲۰۲۰ پراختیایي کنفرانس ترسره کېدو، د اسلامي هیوادونو تر منځ د اړیکو په رول په پیاوړي کولو، راتلونکو پلانونو او نورو ورته مسایلو په اړه بحث او د نظرونو تبادله وشوه.
د مالیې وزارت سرپرست له افغانستان سره د اسلامي همکاریو سازمان له مرستو مننه وکړه او د افغانستان لپاره یې د دې مرستو رول غوره وباله.
په دې لیدنه کې د اسلامي همکاریو سازمان سفیر او دایمي استازي، له افغانستان سره د یاد سازمان د مرستو په دوام ټینګار وکړ.
