د مالیې وزارت نوماند وزیر: د کرونا ویروس د خپرېدو مخنیوي لپاره دي نور مالي امکانات چمتو شي
د مالیې وزارت د رهبرۍ ناسته نن د وري میاشتې په ۲۶ مه نېټه د مالیې وزارت نوماند وزیر او سرپرست ښاغلي عبدالهادي ارغندیوال، په مشرۍ جوړه شوه.
د ناستې په پیل کې اړوندو مسؤلینو د ملي عوایدو راټولېدو، پراختیایي او عادي بودیجې د لګښت او مالیې وزارت نورو کاري پرمختګونو په تړاو معلومات وړاندي کړل همداشان د کرونا له ویروس سره د مبارزې او مالي امکاناتو په برابرولو هم خبرې او د نظر څرګندونې وشوې.
د مالیې وزارت سرپرست، هغوی ته لارښوونه وکړه، چې د ملي عوایدو راټولېدو او پراختیایي او عادي بودیجې په لګښت کې دي زیاته هڅه وشي، نوموړي وویل، چې په عادي او پراختیایي بودیجه کې دي له نورو ادارو سره په همغږۍ او همکارۍ ځینې اضافي لګښتونه راکمې کړی شي څو د کرونا ناروغۍ د مخنیوي په برخه کې ولګول شي
د یادونې وړده، چې تر دې دمه ۵۷.۷۶ میلیارده ملي عواید راټول شوي دي، چې له دې ډلې ۱۹.۴۳ میلیارده له ګمرکونو، ۲۰.۰۲میلیارده له مالیاتو او ۱۸.۳۸میلیارده هم له غیرمالیاتي برخو څخه ترلاسه شوي او دا شان تر دې دمه ۱۳.۲٪ سلنه پراختیایي بودیجه او ۲۵.۴٪ عادي بودیجه په مصرف رسېدلې ده، چې په ټوله کې د ملي بودیجې ۲۱.۵ سلنه جوړوي.
