د مالیې وزارت په مالي معینیت کې د مالي سندونو د تعقیبولو اپلیکیشن سیستم پرانیستل شو
د مالیې وزارت مالي مرستیال ښاغلي عبدالحبیب ځدراڼ، نن د زمري میاشتې په ۲۰ مه نېټه په مالیې وزارت کې د یوې ناستې په مهال په مالي معینیت کې د مالي سندونو د تعقیبولو اپلیکیشن سیستم رامنځته کېدو خبر ورکړ.
د دې اپلیکېشن د رامنځته کېدو موخه؛ د مالیې وزارت مالي معینیت د داخلي او بهرنیو سندونو او مکاتبو د تعقیبولو مدیریت کول دي، چې د کاري بهیرونو د چټکتیا سبب ګرځي او د مراجعینو د وخت له ضایع کېدو مخنیوی کوي. دغه اپلیکېشن به د مالي معینیت په ټولو برخو او ټولو اړوندو واحدونو کې نصب او د ګټې اخیستنې وړ وګرځي.
یاد اپلیکېشن د مالیې وزارت د معلوماتي ټکنالوژۍ ریاست له لوري جوړ شوی او تر پروسس لاندې سندونو او مکاتبو د مدیریت او تعقیب، د سندونو د پرمختګ د څرنګوالې ښکارندوی، د سندونو د پروسې له بشپړېدو او د پرېکړې نیونې راپور له وړاندې کولو وروسته مراجعینو او اړوندو اړخونو ته د برېښنایي پیغام استونې وړتیا لري.
د اپلیکېشن لینک به په روانه اوونۍ کې د مالیې وزارت د ټولنیزو پاڼو له لارې خپور، مراجعینو او اړوندو ادارو ته د لاسرسي وړ وي.
