د مالیې وزیر د قوش تېپې کانال شاوخوا ځمکو د معقولي ګټي اخیستني د طرحي وړاندي کولو په غونډه کي ګډون وکړ!
پنجشنبه د کب ۱۶مه ۱۴۰۳ هـ.ل
د قوش تېپې کانال شاوخوا ځمکو د معقولي ګټې اخیستني طرحه، چي د مالیې وزارت، د کرني، اوبو لګولو او مالدارۍ وزارت او اړوندو ادارو په همکارۍ چمتو سوې ده، د یوې غونډي په ترڅ کي د امارت لوړپوړو مسئولینو ته وړاندي سوه.
په همدې موخه جوړه سوې غونډه کي، چي د کرني په وزارت کي جوړه سوې وه، د مالیې وزیر الحاج ملا محمد ناصر اخوند، د کرني، اوبولګولو او مالدارۍ وزیر مولوي عطاءالله عمري، د کور او ښار جوړوني وزیر مولوي حمدالله نعماني، د چارو ادارې لوی رئیس شیخ الحدیث مولوي نورالحق انور او یو شمېر نورو مسئولینو ګډون کړی وو.
په دغه غونډه کي د قوش تېپې کانال پر اهمیت او د یادي طرحي د چمتو کولو پر موخو خبري وسوې او ټینګار په دې وسو، چي د دې کانال شاوخوا ځمکو څخه اغېزمنه ګټه واخیستل سي او په دې سیمو کي منظمو صنعتي، کرنیزو او مالدارۍ کمپلکسونو ته وده ورکړل سي.
د یادوني ده، چي دا طرحه د طبیعي سرچینو د ښې ګټي اخیستني او د قوشتېپې کانال شاوخوا سیمو د اقتصادي ودي له پاره یو مهم ګام ګڼل کېږي او تمه ده، چي د خصوصي سکټور او پانګوالو په همکارۍ په دې سیمه کي د مثبتو بدلونونو شاهدان و اوسو.
