د مرکزي املاکو رئيس او ورسره مل پلاوي د بګرامیو نساجي له فابريكې څخه ليدنه وکړه!
د مالیې وزارت د امارتي املاکو لوی ریاست د مرکزي املاکو د څارني او ساتني رٸيس انجنیر عبداللطيف خالد او ورسره مل پلاوي د بګرامیو نساجي فابریکې اړوند صنعتي شرکتونو او د املاکو لوی رياست له لوري په قرارداد ورکړل سويو صنعتي فابریکو څخه ليدنه وکړه.
د دغي لیدني په ترڅ کي یاد پلاوي د فابريکو پر ښې ساتني او د قراردادونو پر غوره تطبیق ټینګار وکړ او د یادو فابریکو د مستأجرينو او کارکوونکو ستونزي او غوښتني ئې هم واورېدې. یاد پلاوي ژمنه وکړه، چي د دغو فابريکو د لا ډېر پرمختګ په موخه به د دوی اړیني غوښتني او ستونزي له اړونده چارواکو او مسئولینو سره شریکي کړي.
د یادوني وړ ده، چي د مالیې وزارت د امارتي املاکو لوی ریاست د کره املاکي ارقامو او احصائیې راټولولو، په هیواد کي دننه او بهر د مالیې وزارت اړوند غیر منقولو جایدادنو د ثبت او اجاره ورکولو او د اسنادو له مخي د دولت او ولس ترمنځ د املاکي شخړو د حل مسئولیت په غاړه لري.
