د معلوماتي ټکنالوژۍ د روزنیزو پروګرامونو ۲۷تنو ګډونوالو ته تصدیق پاڼي ورکړل سوې!

د مالیې وزارت د معلوماتي ټکنالوژۍ ریاست (۳۰) تنو کارکوونکو ته د دغه وزارت د بشري سرچینو ریاست له لوري د ۴ میاشتو له پاره د معلوماتي ټکنالوژۍ په برخه کې روزنیز پروګرام جوړ سوی وو؛ د درسونو له بشپړاوي وروسته، ۲۷تنو ګډونوالو رقابتی ازموینه په بریالیتوب ترسره او تصدیق پاڼي ورکړل سوې.
په همدې پار د مالیې وزارت په خیبرهال کي یوه ناسته جوړه سوې وه، چي د مالیې وزارت د معلوماتي ټکنالوژۍ رئیس انجنير عمران احمد فرحان، د زوم بایټ ټکنالوژۍ شرکت مرستیال منیر احمد عیسی خیل، د بشري سرچینو ریاست د روزني او ظرفیت لوړوني آمر محمد نادر همایون او یو شمېر نورو کارکوونکو پکښې ګډون کړی وو.
یاده ناسته د قرآن عظیم الشان د مبارکو ایتونو په تلاوت سره پیل سوه، ورپسې د مالیې وزارت د معلوماتي ټکنالوژۍ رئیس په دې ناسته کي ټولو ګډونوالو ته د ښه راغلاست ترڅنګ وویل، د معلوماتي ټکنالوژۍ ریاست د کارکووونکو د ظرفیت لوړوني په موخه د بشري سرچینو ریاست د هلو ځلو او همکارۍ په پایله کې د (CCNA، MCSA او Visualization) په برخو کي، چي کوم روزنیز پروګرام جوړ سوی وو، ګټور تمام سوی دئ او په راتلونکي کي به هم دغه ډول روزنيز پروګرامونه د کارکوونکو له پاره جوړ سي.
عمران احمد فرحان زیاته کړه، چي د معلوماتي ټکنالوژۍ ریاست د کارکوونکو د ظرفیت لوړولو په موخه به اکونټونه جوړ سي؛ ترڅو د دې ریاست ټول کارکوونکي وکولای سي د معلوماتي ټکنالوژۍ اړوند انلاین روزنیزو پروګرامونو څخه ګټه پورته او خپلي وړتیاوي لوړي کړي.
د زوم بایت ټکنالوژيکي خدمتونو شرکت ( ZOOM BYTE IT SERVICES) مرستیال وویل، چي د (CCNA، MCSA او Visualization) رونیزو پروګرامونو جوړول به د معلوماتي ټکنالوژۍ ریاست کارکوونکو سره مرسته وکړي، چي د شبکه جوړوني په برخه کي ډېرو ستونزو ته د پای ټکی کښېږدي.
په وروستیو کي د معلوماتي ټکنالوژۍ ریاست کارکوونکو ته تصدیق پاڼي هم ووېشل سوې.