د ملي بانک او نوی کابل بانک د یوځای کېدو په اړه غونډه جوړه شوه
د مالیې وزارت نوماند وزیر او سرپرست ښاغلي عبدالهادي ارغندیوال، په مشرۍ د وږې میاشتې په ۱۵ مه نېټه د ملي بانک او نوي کابل بانک د یوځای کېدو په موخه په مالیې وزارت کې ناسته جوړه وشوه.
په دې ناسته کې د افغانستان بانک سرپرست ښاغلي اجمل احمدي، د افغانستان د مرکزي سرشمېرنې ادارې رئیس ښاغلي احمد جاوید رسولي، د مالیې وزارت مالي مرستیال ښاغلي عبدالحبیب ځدراڼ، د کابل بانک او ملي بانک رئیسانو او د ولسمشرۍ ماڼۍ د چارو ادارې استازي ګډون کړی وو.
په پیل کې د افغانستان بانک سرپرست د یادو دواړو بانکونو د وضعیت په اړه معلومات وړاندې کړل او وویل چې د یادو بانکونو د یوځای کېدو موخه د کارونو اغېز زیاتول او خلکو ته د دولتي بانکونو له لوري د غوره خدمتونو وړاندې کول دي.
د افغانستان د مرکزې سرشمېرنې ادارې رئیس وویل، چې د جلالتماب ولسمشر له حکم سره سم موږ د دواړو بانکونو تخنیکي سیستمونه څېړلي، د دواړو بانکونو څرنګوالی او وړتیاوې مو پېژندلي او طرحه مو چمتو کړي ده، چې په دې طرحه کې د یادو بانکونو د یوځای کېدو لنډمهاله، منځمهاله او اوږدمهاله اقدامات روښانه شوي دي.
د دې ناستې په یوه برخه کې د دواړو بانکونو رئیسانو د یادو بانکونو د اوسني وضعیت او سیستمونو په اړه معلومات وړاندې کړل او دواړو لوریو د بانکونو یوځای کیدو ته چمتو والی وښود.
د مالیې وزارت سرپرست وویل، چې د جلالتماب ولسمشر د حکم له مخې ملي بانک او نوی کابل بانک یوځای کېږي او دا د پیسو نړیوال صندوق سره د حکومت ژمنه هم ده. نوموړي زیاته کړه، چې د ټولو ادارو نظرونه باید راټول او مالیې وزارت ته واستول شي څو یوه واحده طرحه چمتو او د ولسمشرۍ عالي مقام ته وړاندې شي، چې د دوی د نظرونو له اخیستو وروسته یې عملي چارې پیل شي.
په پای کې پرېکړه وشوه، چې د ولسمشرۍ عالي مقام له نظرونو اخیستو وروسته د یادې طرحې په تړاو د افغانستان له نړیوالو شریکانو په ځانګړي توګه د پیسو له نړیوال صندوق او نړیوال بانک سره تخنیکي سلا مشورې هم وشي.
