د ننګرهار او کندهار ګمرکونه دي ۲۴ ساعته فعالیت وکړي
د مالیې وزارت د عوایدو او ګمرکونو معین الحاج ملا محمد ناصر اخند د ننګرهار او کندهار د ګمرکونو مسؤلینو ته هدایت ورکړی، چي سوداګرو ته د اسانتیاوو رامنځته کولو او په پرلپسې توګه هیواد ته د اړینو توکو د صادرولو او واردولو په موخه دي یاد ګمرکونه په ۲۴ ساعته توګه په دوه شفټونو کي پرانیستي وي.
د دې ترڅنګ د همدې هدایت په یوه بله برخه کي د خوست ولایت د غلام خان چک پوسټ او پکتیا ولایت د ډنډپټان چک پوسټ مسؤلینو ته ویل سوي، چي سوداګرو ته د لازمو اسانتیاوو برابرولو په موخه دي یاد چک پوسټونه ۱۲ ساعته خدمتونه وړاندي کړي او همدا راز اړوندو مسؤلینو ته په هدایت کې ویل سوي، چي د بار وړونکو وسایطو په تګ او راتګ کي دي تعادل په پام کي ونیسي.
د یادونې وړده، چي د مالیې وزارت مشرتابه ملي سوداګرو ته د اسانتیاوو برابرولو په موخه وخت نا وخت د ګمرکونو له مسؤلینو سره ويني او د هر راز سهولتونو برابرولو زمینه ورته برابروي.
