د هیواد له ګمرکونو څخه په ورځني ډول زرګونه، صادراتي، وارداتي او ټرانزيټي محمولې تګ راتګ کوي!
د مالیې وزارت له لوري د هیواد په ټولو ګمرکونو کي سوداګرو ته د پام وړ اسانتیاوي رامنځته سوي دي. په ګمرکونو کي کاري موده له (۱۶) څخه تر (۲۴) ساعتونو پوري زیاته سوې، عصري برېښنایي سیسټمونه فعاله سوي، د بهرني ټرانزیټ زماني معیاد له (۵) ورځو څخه (۱۰) ورځو ته غځول سوی او د سوداګریزو توکو په طی مراحلو کي روڼتیا او لازمه چټکتیا رامنځته سوې، چي ورسره د صادراتو، بهرني ټرانزیټ او وارداتو په کچه کي هم د پام وړ زیاتوالی راغلی دئ.
پر همدې بنسټ، د هیواد له ټولو ګمرکونو څخه په اوسط ډول د ورځي نږدې (۲۴۰۰) صادراتي، وارداتي او ټرانزیټي محمولي تګ راتګ کوي، چي له دې شمېر څخه په ورځني ډول، نږدې (۱۸۸۰) وارداتي، څه کم (۴۳۰) صادراتي او نږدې (۱۰۰) بهرنۍ ټرانزیټي محمولې تګ راتګ کوي، چي ټولیز وزن ئې څه باندې (۶۰) زره ټنو ته رسېږي.
د یادوني وړ ده، چي د مالیې وزارت له لوري د ګمرکونو د عصري کولو په لړ کي به ډېر ژر د هیواد په (۱۶) ګمرکونو کي (۲۴) لویي پایې برېښنایي سکنرونه هم نصب سي، چي ورسره به د سوداګریزو توکو په طي مراحلو کي لا ډېره روڼتیا، چټکتیا او ښه والی رامنځته سي.
