د ولایتي مستوفیتونو اداري عمومي مدیرانو لپاره انلاین روزنیز پروګرام ترسره سو
د مالیې وزارت د بشري سرچینو ریاست د مالي او حسابي عمومي ریاست سره په همږغۍ د ولایتي مستوفیتونو د عمومي اداري مدیرانو لپاره د انلاین اوونیز روزنیز پروګرام ترسره کړ.
دغه پروګرام کي، چي د ماليي وزارت په خيبر هال کي چمتو سوی و، د ماليې وزارت د بشري سرچینو رئيس مولوي احمدشاه شاکر، د ماليې وزارت مالي او حسابي رئيس، احمدشاه احمدزي او د دې رياست يو شمېر کارکوونکو ګډون کړى و.
مولوي احمدشاه شاکر په خپله پرانیستې وینا کي ګډونوالو ته د ښه راغلاست ترڅنګ وویل، اداري مدیریت د مستوفیت یوه له مهمو برخو څخه دی، چي د ټولو څانګو د مدیریت، څارني او کنټرول دنده په غاړه لري؛ نو له دې روزنیز پروګرام څخه مثبتي پایلي ترلاسه او خپلي وړتیاوي لوړي کړئ. هغه زیاته کړه، تاسي د دې بستونو وړ یاست، نو د قناعت وړ خدمات وړاندي کړئ او خپلو کارونو کي صادق واوسئ.
وروسته بیا مالي او حسابي رئیس محترم احمدشاه احمدزي د یاد پروګرام په اړه لنډ معلومات وړاندي کړل او زیاته یې کړه، چي مستوفیتونه په ولایتونو کي د مالیې وزارت استازي دي او د وزارت د موخو په ترلاسه کولو کي حمایوي او خورا مهم رول لري. ستاسي څخه دا تمه لرو، چي د موخو، بنسټیزو فعالیتونو، تدارکاتو او خدماتو په برخه کي خپل معلومات په کافي اندازه زیات او خلکو ته غوره خدمات وړاندي کړئ.
