د پایداره پراختیایي موخو ملاتړ د پلټنې نړیوال کنفرانس ترسره شو
د ترکمنستان هیواد په کوربتوب د ویډیو کنفرانس له لارې د ملګرو ملتونو د پایداره پراختیایي موخو ملاتړ د پلټنې نړیوال کنفرانس نن د غبرګولې میاشتې په ۸ مه نېټه ترسره شو.
په دې کنفرانس کې د ملګرو ملتونو پایداره پراختیایي موخو مسؤل، د پیسو نړیوال صندوق اجرائیوي مرستیال او د منځنۍ اسیا هیوادونو د اقتصادي چارو وزیرانو او مرستیالانو ګډون کړی وو.
په یاد کنفرانس کې د مالیې نوماند وزیر او سرپرست ښاغلي عبدالهادي ارغندیوال، او د اقتصاد وزیر ښاغلي مصطفی مستور؛ د افغانستان په استازیتوب خبرې وکړې.
په پیل کې د پیسو نړیوال صندوق اجرائیوي مرستیال او د ملګرو ملتونو پایداره پراختیایي موخو مسؤل، په اقتصاد، سوداګرۍ، راکړه ورکړه باندې د کرونا ویروس په منفي اغېزو خبرې وکړې او زیاته یې کړه، چې د کرونا ویروس خپرېدو د نړۍ په کچه بېکاري او بېوزلي رامنځته کړې. نوموړي زیاته کړه، اړتیا ده، چې د دې ستونزو د هواري لپاره په یوه خوله او ګډه کار وکړو. هغه زیاته کړه، چې اوسني ستونزمن حالت ته په کتو د ملګرو ملتونو او پیسو نړیوال صندوق د وړاندوېینې پربنسټ د منځنۍ اسیا هیوادونو اقتصادي وده به له ۳ تر ۴ سلنې پوري را ښکته شي.
د مالیې وزارت سرپرست ښاغلي ارغندیوال، د دې کنفرانس په یوه برخه کې د کنفرانس د کوربتوب له کبله له ترکمنستان هیواده د مننې ترڅنګ د کرونا له ویروس سره د مبارزې لپاره د مالي کڅوړې ترتیبېدو په تړاو معلومات ورکړل. هغه وویل، چې کرونا ویروس نه یوازې د منځنۍ اسیا هیوادونو په اقتصاد بلکې د نړۍ په کچه یې په اقتصادي وده منفي اغېزې کړې دي.
د مالیې وزارت سرپرست وویل، چې هیوادونه دي د پایداره پراختیا پروګرامونه داسي عیار کړي، چې د هیوادونو د پیاوړتیا سبب شي او د کرونا ویروس د ستونزو د حل لپاره مطلوبه لاره ومومي. هغه زیاته کړه، اړتیا ده چې د هیوادونو اوسني وضعیت ته په کتو د پایداره پراختیایي پروګرامونو ملاتړ له سره و ارزول شي.
د افغانستان د اقتصاد وزیر ښاغلي مصطفی مستور وویل، چې کرونا ویروس به د تېرو کلونو په پرتله د افغانستان اقتصادي وده کمه کړي او د بېکارۍ او بېوزلۍ سبب ګرځي. هغه زیاته کړه، چې موږ د پایداره پراختیا ملاتړ ته ژمن یو او د ۲۰۲۰ او ۲۰۳۰ کلونو لپاره اړونده ستراتېژي د افغانستان د حکومت له لوري منظور شوې ده.
