د کورنۍ پلټني لوی رئيس او ورسره مل پلاوي د هيواد ختیځو ولایتونو ته سفر وکړ!
د مالیې وزارت د کورنۍ پلټني لوی رئیس انجنیر عبداللطیف خالد په مشرۍ یوه پلاوي د چارو د هر اړخیزي ارزوني په موخه د ننګرهار، لغمان، کونړ او نورستان ولایتونو د مستوفیتونو او همدارنګه د ننګرهار او کونړ ولایتونو له ګمرکونو څخه په جلا توګه لیدنه وکړه.
پلاوي د خپل سفر په ترڅ کي د پلټونکو له لوري د پخوانیو پلټنو په لړ کي د ورکړل سويو اصلاحي سپارښتنو د پلي کولو څرنګوالی تعقیب کړ، چي له نېکه مرغه یادو ادارو ډېری سپارښتني پلي کړي وې. د کورنۍ پلټني لوی رئیس د ادارو له مسؤلینو وغوښتل، چي د پاتي سپارښتنو پلي کولو ته جدي پاملرنه وکړي او د پرمختګ راپور ئې د کورنۍ پلټني له لوی ریاست سره شریک کړي.
ورپسې د کورنۍ پلټني لوی رئیس او ورسره مل پلاوي د یادو ادارو د هر آمریت او مدیریت د چارو ارزونه وکړه او وروسته ئې د اړوندي ادارې د مسئول په شتون کي د آمرینو او مدیرانو سره نیمګړتیاوي شریکي کړې؛ تر څو ئې په اړه لازم اجراآت ترسره سي.
په پای کي د کورنۍ پلټنې لوی رئیس د یادو ادارو د مسئولینو هغه ستونزي او غوښتني، چي باید په مرکز کي ورته رسېدنه وسي واورېدې او ژمنه ئې وکړه، چي د وزارت له مشرتابه سره به ئې ډېر ژر شریکي کړي.
