د ګمرکونو او عوایدو معینیت د همغږۍ ناسته کي د نفتي موادو په برخه کي د سوداګرو پر ستونزو خبري وسوې!
د مالیې وزارت د ګمرکونو او عوایدو معینیت د اړوندو ریاستونو تر منځ د همغږۍ ناسته د ګمرکونو او عوایدو معین الحاج مفتي عبدالمتین سعید په مشرۍ د یاد معینیت د غونډو په تالار کې جوړه سوه.
د ناستي په پیل کي د ګمرکونو او عوایدو معین د چارو د لا ښه والي په موخه اړوندو مسؤلینو ته پر خپل وخت سره د مراجعینو ستونزو ته د رسېدو او له دوی سره د غوره چلند، د کارکوونکو د وړتیا لوړولو، په چارو کي د همکارۍ او همغږۍ د لا زیاتېدو او ځینو نورو برخو کي لازمي سپارښتني وکړې.
ورپسې د ولایتي مستوفیتونو او ګمرکونو ترمنځ د ښې همغږۍ رامنځته کولو په موخه د جوړي سوي کمېټې راپور وړاندي سو، چي د غونډي د ګډونوالو له لوري پرې هر اړخیز بحث او په اړه ئې لازمي پرېکړي وسوې. سربېره پر دې د نفتي موادو د کیفیت او کنټرول ریاست اړوند د ځینو سوداګرو پر ستونزو او حل لارو، د ګمرکونو لوی ریاست او د شکایتونو د اورېدو ریاست پر ځینو موضوعاتو هم خبري او پرېکړي وسوې.
د یادوني ده، چي دغه ناستي د ګمرکونو او عوایدو معینیت د اړوندو ریاستونو تر منځ د ګډو همکاریو د پیاوړتیا په موخه جوړېږي، چي ورته ناستي به په راتلونکي کي هم ترسره سي.
