د ګمرکونو لوی رئیس د کندهار له والي سره ولیدل!
د وږي ۲مه ۱۴۰۴ هـ.ل
د ګمرکونو لوی رئیس الحاج مولوي محمد حامد احمد، چي په رسمي سفر کندهار ولایت ته تللی، هلته ئې د دغه ولایت په مقام کي د کندهار له والي حاجي ملا صاحب سره هم لیدلي.
په دې لیدنه کي دواړو لوریو د ګمرکي چارو پر لا ښه کېدو، د سوداګرو د ستونزو پر حلولو او یو شمېر نورو موضوعاتو بحث او خبري وکړې، سربېره پر دې مولوي منصور الحق ذاکر، چي د مالیې وزارت په وړاندیز او د ریاست الوزراء عالي مقام په منظورۍ د کندهار ګمرک د نوي رئیس په توګه ټاکل سوی د دې سفر په لړ کي د کندهار د والي مرستیال او د یاد ولایت د سوداګرۍ او پانګوني خوني د استازو په حضور کي اړوندو کارکوونکو ته ور وپېژندل سو او په چارو کي د بریالیتوب دعا ورته وسوه. د دې ترڅنګ د نوموړي له کارکوونکو او مسئولینو څخه وغوښتل سول، چي له نوي ټاکل سوي رئیس سره په چارو کي هر اړخیزه همکاري وکړي.
همدارنګه د کندهار د سوداګرۍ او پانګوني خوني استازي له لوري د یاد ګمرک پخواني رئیس ته د تقدیر پاڼي په ورکولو سره د نوموړي د کړنو او فعالیتونو ستاینه هم وسوه.
د یادوني وړ ده، چي مولوي منصور الحق ذاکر په ګمرکي چارو کي بشپړه کاري تجربه لري او تر دې وړاندي ئې د ننګرهار ګمرک د رئیس په توګه دنده ترسره کړې ده.
