د ګمرکونو لوی ریاست تر ټاکلي هدف زیات عواید راټول کړي
د مالیې وزارت د ګمرکونو لوی ریاست ته د (۱۴۰۱) مالي کال په لومړیو کي (۹۶) میلیارډه افغانۍ عوایدي هدف ورکړل سوی وو، چي د کال په منځنۍ برخه کي ورکړل سوی هدف د مالیې وزارت له لوري (۱۰۵.۴) میلیارډه افغانیو ته لوړ سو او د ګمرکونو لوی ریاست وکولای سول دغه هدف د همدې مالي کال د کب میاشتي په (۱۴مه) نېټه بشپړ کړي.
په (۱۴۰۱) مالي کال کي د ګمرکونو ټول راټول سوي حقیقي عواید (۱۱۱.۵) میلیارډه افغانیو ته لوړ سول، چي له ټاکل سوي هدف څخه (۵.۸) سلنه یا (۶.۱) میلیارډه افغانۍ زیاتوالی ښيي او دا د افغانستان اسلامي امارت د (۱۴۰۱) مالي کال د ټولو عوایدو (۵۷.۷) سلنه جوړوي. تر دې وړاندي د هيواد ګمرکونو هیڅکله هم دومره عواید نه دي راټول کړي.
د یادوني وړ ده، چي د ګمرکونو لوی ریاست د (۱۴۰۱) مالي کال په عوایدو کي (۹۴.۲۷) میلیارډه افغانۍ له وارداتو، (۱۵.۲۴) میلیارډه افغانۍ له صادراتو او (۲.۰۲) میلیارډه افغانۍ له بهرني ټرانزیټ څخه تر لاسه کړي دي.
