د ګمرکونو لوی ریاست نوی ټاکل سوی رئیس اړوندو کارکوونکو ته ور وپیژندل سو!
د مالیې وزارت په وړاندیز او د ریاست الوزراء لوړ مقام په منظورۍ، مولوي محمد حامد احمد د ګمرکونو لوی رئیس په توګه او حافظ حضرت علي صالح د یاد ریاست د قانون تنفیذ او اطاعت پذیرۍ د رئیس په توګه، د ګمرکونو او عوایدو معین الحاج مفتي عبدالمتین سعید له لوري اړوندو کارکوونکو ته ور وپېژندل سول.
په همدې تړاو جوړه سوې غونډه کي د ګمرکونو او عوایدو معین، له مسؤلینو وغوښتل، چي خپل مسؤلیتونو په ښه ډول ترسره کړي، ولس ته اسانتیاوي رامنځته او د هغوي ستونزو ته پر وخت رسېدنه وکړي.
د یادوني وړ ده، چي د ګمرکونو لوی ریاست نوی ټاکل سوی رئیس له دې وړاندي د کندهار، هرات او ننګرهار ګمرکونو د رئیس په توګه دندې ترسره کړي او په ګمرکي چارو کي د پوره کاري تجربې څخه برخمن دئ، چي ورسره به د یاد ریاست په چارو کي لا ډېر پرمختګونه رامنځته سي.
