د ۱۴۰۰مالي کال په ملي بودیجه کې د زابل ولایت د خلکو اړتیا وو شاملولو په موخه له دوی سره د حکومت مشورتي ناسته وشوه
۱۴۰۰مالي کال په ملي بودیجې په طرحه کې د زابل ولایت د خلکو اړتیا وو شاملولو په موخه له دوی سره د حکومت د سلا مشورو ناسته د تلې میاشتې په ۷ مه نېټه وشوه.
په دې ناسته کې د مالیې وزارت استازي ښاغلي احمد فرید کریمي، د زابل ولایت باصلاحیته استازي ښاغلي حاجي محمد اسماعیل، د زابل ولایت د سکټور رئیس ښاغلي زلمي وطن، د ښځو چارو رئیسې اغلې صدیقې جلالي، قومي سپینږیرو او مخورو، د مدني ټولنو استازو او د دې ولایت یو شمېر اوسېدونکو ګډون درلود.
د مالیې وزارت استازي ښاغلي احمد فرید کریمي وویل:" د راتلونکي کال ملي بودیجې په طرحه کې د زابل ولایت د سترو پروژو ترڅنګ د کوچنیو او ټولګټو پروژو لپاره ۷۴ میلیونه افغانۍ په پام کې نیول شوی دي، زموږ هیله داده، چې د زابل ولایت شریف وګړي، د بودیجې ټاکل شوي سقف په پام کې نیولو سره له موږ سره خپلې اړتیاوې او لومړیتوبونه شریک کړي او موږ وکولی شو، دغه اړتیاوې یې د راتلونکي کال ملې بودیجې په طرحه کې شاملي کړو."
ښاغلي کریمي زیاته کړه، چې د مالیې وزارت د مشرتابه له پلان سره سم له حکومت سره د خلکو د مشورتي ناستو موخه داده، چې د خلکو لومړیتوب لرونکي پروژې انتخاب او موږ یې په پام کې نیولو سره وکولی شو د خلکو اړتیاوو ته ورسېږو.
هغه زیاته کړه، روڼتیا، حساب ورکړه، متوازنه پراختیا، د غوره خدمتونو وړاندي کول د ښې او بریالۍ حکومتولۍ بېلګه ده. له همدې کبله د مالیې وزارت مشرتابه له دوو کالو راپدیخوا د ښې بودیجې ترتیبولو لپاره له خلکو سره د مشورتي ناستې پروګرام پیل کړی دی.
د زابل ولایت باصلاحیته استازي ښاغلي حاجي محمد اسماعیل وویل، موږ د حکومت د لومړیتوب او سیمه ایزې حکومتولۍ پیاوړتیا په پام کې نیولو سره د بودیجې ترتیبولو په برخه کې د مالیې وزارت د طرحې هر کلی کوو. هغه زیاته کړه، چې په زابل ولایت کې زیاتې روغونې ته اړتیا ده او له مرکزي دولت څخه غواړو چې د پوهنې، روغتیا او کرنې په برخه کې زابل ولایت ته زیاته پاملرنه وکړي. همدا شان د زابل ولایت له اوسېدونکو غوښتنه کوو، چې د سیمې د خلکو د اړتیا وړ پروژې وټاکي څو د خلکو اړتیاوو ته ښه رسېدنه وشي.
د زابل ولایت د ښځو چارو رئیسې اغلې صدیقې جلالي، دې ولایت ته د جلالتماب ولسمشر او مالیې وزارت مشرتابه له پاملرنې د مننې ترڅنګ وویل: موږ نن ورځ له مرکز څخه د پلاوي راتلل نېک پال ګڼو چې د زابل ولایت د خلکو اړتیاوې د راتلونکي کال ملي بودیجې په طرحه کې شاملوي. نوموړې زیاته کړه، چې له حکومت او د مالیې له وزارت څخه زموږ غوښتنه داده چې په دې ولایت کې د ښځینه طبقې زده کړو او ودې ته زیاته پاملرنه وکړي.
په یاده ناسته کې د مالیې وزارت د بودیجې عمومي ریاست له لوري، په دې اړه پریزینټېشن هم وړاندې شو او ګډونوالو ته اړین معلومات ورکول شول. د دې ترڅنګ د زابل ولایت د خلکو نظرونه، وړاندیزونه او اړتیاوې هم واورېدل شوې او د مالیې وزارت د بودیجې عمومي ریاست د تخنیکي ټیم له لوري د دوی پوښتنو ته ځوابونه وویل شول.
