د ۱۴۰۳ مالي کال ملي بودیجې د اصولنامي پلي کولو په موخه دوه ورځنی روزنیز ورکشاپ پیل سو!
د عالیقدر امیرالمؤمنین حفظه الله له لوري د ( ۱۴۰۳هـ.ل) مالي کال د ملي بودیجې د اجراء اصولنامې له توشېح کېدو وروسته، یاده اصولنامه د هر اړخیز پلي کولو په موخه له مالیې وزرات سره شریکه سوه.
دغه اصولنامه به د مالیې وزارت له لوري له ټولو بودیجوي واحدونو سره هم شریکه سي، چې له همدې کبله د مالیې وزارت له لوري د بودیجوي واحدونو مسؤلینو ته دوه ورځنی روزنیز ورکشاپ د دغه وزارت په خیبر سالون کي جوړ سو.
د دغه روزنیز ورکشاپ په پرانیستغونډه کي د مالیې وزارت مالي معین حاجي عبدالقدیر احمد، د ملي بودیجې لوی ریاست مسؤلینو او د بودیجوي واحدونو استازو ګډون کړی وو.
د مالیې وزارت مالي معین وویل، چي د افغانستان ملي بودیجه د بهرني ملاتړ څخه پرته په خپلواکه توګه له کورنیو عوایدو څخه تمویلېږي؛ نو باید د ملي بودیجې د ښه مدیریت په برخه کي پوره روڼتیا، دقیق پلان جوړونه او د لګښتونو د کنټرول مهمو اصولو ته ځانګړي پاملرنه وسي.
د یادوني وړ ده، د بودیجې د اجراء اصولنامه د ملي بودیجې ترتیب، په دې برخه کي اړین صلاحیتونه او د بودیجې د اجراء او کنټرول څرنګوالی په ګوته کوي، چي په عملي کېدلو سره ئې د ملي بودیجې او لګښتونو اغېزمن او مؤثر مدیریت ته زمینه برابرېږي او د مالي کال په جریان کي ټولي اړیني مالي چاري واضح کوي.
