مالیې وزارت سرپرست په کابل کې د ترکمنستان له سفیر سره په اقتصادي موضوعاتو خبرې وکړې
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د تلې میاشتې په ۲۳ مه نېټه په کابل کې د ترکمنستان له سفیر ښاغلي اویزوف خواجه سفر ګیدیچ، سره په مالیه وزارت کې ولیدل.
په دې لیدنه کې دواړو لوریو له ترکمنستان سره د لاسلیک شویو پروژو د روان بهیر په پرمختګ، لکه اوسپنې پټلۍ، برېښنا انرژۍ او سیمه ایزې نښلونې په تړاو بحث او د نظرونو تبادله وکړه. همدا شان دواړو لوریو د افغانستان او ترکمنستان ترمنځ د دوه اړخیزه اقتصادي کمېسیون ترسره کېدو لپاره د مناسب وخت په ټاکل کېدو هم خبرې وکړې.
د ترکمنستان سفیر ډاډ ورکړ، چې هیواد یې د افغانستان او ترکمنستان ترمنځ د لاسلیک شویو پروژو د کاري بهیر چټکېدو ته ژمن دی.
