مالیې وزارت کې د جوړښتونو بدلون په اړه د مالیې وزارت رهبرۍ او د اداري اصلاحاتو خپلواک کمېسیون غونډه
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د کب میاشتې په ۲۹ مه نېټه د اداري اصلاحاتو او ملکي خدمتونو خپلواک کمېسیون له رئیس ښاغلي نادر نادري سره په مالیې وزارت کې وکتل.
په دې کتنه کې چې د دواړو لوریو تخنیکي ټیمونو هم شتون درلود، د مالیې وزارت سرپرست وویل چې په ټاکل شوې موده کې باید د جلالتمآب ولسمشر فرمان پلي شي او له ځنډ سره مخ نه شي. نوموړي زیاته کړه چې د ادارو د تشکیل جوړښت باید داسې تنظیم شي څو د اغیزمنتیا، روڼتیا او حساب ورکولو اصل تامین کړي.
د مالیې وزارت سرپرست وویل چې د دواړو لوریو تخنیکي ټیمونه باید کاري جوړښت او د دندو لایحې په دوه اړخیزې همغږۍ سره ترتیب کړي څو په دې برخه کې پیچلتیا شتون ونلري.
ښاغلي نادري وویل چې د کمېسیون تخنیکي ټیم به هره ورځ له مالیې وزارت سره په دې برخه کې کار کوي څو نوی جوړښت له قانون سره سم پلی شي.
د یادونې وړ ده چې د مالیې وزارت او د اداري اصلاحاتو او ملکي خدمتونو خپلواک کمېسیون تخنیکي ټیمونو نن د جوړښتونو بدلون په اړه خپل کار پیل کړ.
