پروسږ کال د څه باندي (۵۲) زره ټنه قاچاقي توکو د لېږد رالېږد مخه نیول سوې ده!
د وري ۵مه ۱۴۰۴ هـ.ل
د مالیې وزارت د ګمرکونو لوی ریاست له لوري د هیواد په ګمرکونو کي د اسانتیاوو پر رامنځته کولو سربېره، له فساد سره جدي مبارزه سوې او د مالیې وزارت د ګمرکونو د ساتني او ځانګړو عملیاتو تنفیذي قطعې د ګرځنده څارني قطعاتو له لوري د قاچاقي توکو د لېږد را لېږد په کلکه مخنیوی سوی دئ.
پرهمدې بنسټ، د مالیې وزارت د ګرځنده څارني ځیرکو کارکوونکو پروسږ (۱۴۰۳هـ.ل) کال کي د هیواد د بېلابېلو ګمرکونو په اړوندو سیمو کي (۵۲) زره (۲۹۲) ټنه قاچاقي توکي تعقیب، کشف او نیولي دي.
په نیول سویو قاچاقي توکو کي طبي، زراعتي او یوناني درمل، خوراکي او غیر خوراکي او داسي نور توکي شامل ول، چي په قاچاقي ډول په پټو لارو له ګاونډیو هیوادونو څخه افغانستان ته راوړل کېدل، نیول سوي او په پېښه کي تورن کسان هم مهاله اړوندو پلټونکو ارګانونو ته ورپېژندل سوي دي.
همدارنګه یادو کارکوونکو د هیواد په بېلابېلو سیمو کي (۵۹،۳) ټنه صادراتي قاچاقي توکي لکه زړه اوسپنه، د انسان د سر وېښتان او داسي نور هم نیولي دي.
د یادوني وړده، چي د ګمرکونو د ګرځنده څارني امنیتي او پلټونکي ټیمونه د پروسږکال په څېر خپلي دندي او د هیواد د اقتصادي وضعیت پیاوړي کولو ته سږ کال هم ژمن دي او دوی به په خپل ټول توان د بې قانونیو مخه نیسي او د توکو د قاچاق په مخنیوي که به پوره هڅه کوي.
