په کابل کي ۵۰ جریبه ځمکه له غصب څخه را وګرځول سوه!
![.............](/sites/default/files/2024-06/a5.jpg)
د مالیې وزارت د دولتي املاکو لوی ریاست له لوري د کابل ولایت د بګرامیو ولسوالۍ د نساجي فابریکې ته مخامخ د (۳۲۵) جریبه غصب سوې ځمکي څخه پنځوس جریبه ئې بيرته را وګرځول سوه او د پاتي ځمکي په بيرته راګرځولو کار روان دئ.
د مالیې وزارت اړوند یاده ځمکه، چي له کلونو راهیسي د یو شمېر زورواکو له لوري غصب سوې وه، پکښې غیر قانوني کورونه جوړ سوي ول، چي د دولتي املاکو لوی ریاست له لوري یاد کورونه ړنګ او ځمکه د غاصبینو له واکه ووتله.
د دغي ځمکي په غصبېدو سربېره، په یاده سیمه کي د یو شمېر فرصت طلبه اشخاصو له لوري غیر قانوني کړني هم ترسره کېدلې، چي د سیمي اوسېدونکي ئې اندېښمن کړي ول. د یادو کورونو له ړنګېدو سره په سیمه کي د هر ډول فساد مخه ونیول سوه او د خلکو له پاره بشپړ امنیت رامنځته سو.
د یادوني وړ ده، چي یاده ځمکه باندي به ټولګټي پروژې پلي سي، چي ورسره به د سیمي د ابادۍ، ښکلا او پراختیا ترڅنګ، یو شمېر هیوادوالو ته د کار کولو زمینه هم برابره سي.