د دریو سترو عام المنفعه پروژو په اړه د دولتي ادارو د پلي کولو او اجرائیوي پلان ارزونه
له دولتي ادارو سره د هغو پروژو چې په دې وروستیو کې له سعودي عربستان سره لاسلیک شوې د پلي کیدو تعقیبي غونډه نن د تلې میاشتې په ۲۳ مه نېټه د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، په مشرۍ په مالیې وزارت کې جوړه شوه.
په دې غونډه کې اړوندو ادارو خپل تطبیقي او اجرائیوي پلانونه وړاندې کړل چې په اړه یې بحث او د نظرونو تبادله وشوه او لازمې پریکړې وشوې.
په دې پروژو کې د کابل حلقوي سړک، د زړه ناروغۍ د درملنې روغتون، د هیواد په څلورو زونونو کې د څلورو کلنیکونو جوړول او همداشان په ټول افغانستان کې د ۶۰۰ ښوونځیو جوړول شامل دي.
د یادونې وړ ده چې یادې پروژې سعودي عربستان ته د جلالتماب ولسمشر د سفر پر مهال له یاد هیواد سره لاسلیک شوې وې.
