د مالیې وزارت سرپرست د بنسټونو، محققینو او د بېلابیلو بنسټونو له کارپوهانو سره وکتل
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د استرالیا په کانبرا ښار کې له تروریزم سره د مالي ملاتړ د مبارزې ناستې په څنډو کې د بنسټونو، محققینو او د بېلابیلو بنسټونو له کارپوهانو سره په جلا توګه وکتل.
په دې کتنو کې د مالیې وزارت سرپرست، د افغانستان په هوا چې د تودېدو په حال کې ده، اقلیمي بدلونونو او د افغانستان د اوبو په سرچینو یې د ناوړه اغېز په ځانګړې توګه په کابل ښار کې، په ټول هیواد کې د اوبو په مدیریت، د للمو په کرنه او د اوبونې لپاره د استرالیا په تجربو، کانونو، استوګنیز چاپیریال او په افغانستان کې د سرچینو د مدیریت لپاره له ټکنالوژۍ د ګټې اخیستنې په تړاو مفصلې خبرې وکړې او هغوی یې د ګډ پروګرام لپاره را وبلل.
پورتنیو بنسټونو، په دې برخه کې خپلې تجربې شریکې کړې او د ګډو پروګرامونو لپاره یې د همکارۍ ژمنه وکړه. ټاکل شوې ده، چې پورتني موضوعات ډېر ژر د افغانستان سفارت، پورتنیو بنسټونو په افغانستان کې د مسؤلو بنسټونو ترمنځ د یوه عمل په پلان بدل شي. د افغانستان تاکیدي دریځ په لوړو زده کړو، د ماسټرۍ، دوکتورا او مسلکي انلاین کورسونو په برخه کې د یادو بنسټونو هڅول او په درېیمو هیوادونو کې د استرالیا په مالي ملاتړ د کرنې، اوبو د سرچینو تنظیم او انجینرۍ په کچه تحصیلات وو.
همدا شان په دې جلا ناستو کې د ګریفټ له پوهنتون سره د اوبو د تنظیم ماسټرۍ پروګرام جوړېدو، چې ټاکل شوې د کابل پولیتخنیک په پوهنتون کې ترسره شي، بحث او د نظر څرګندونې وشوې.
