د افغانستان حکومت او اروپایي ټولنې ترمنځ د دولت جوړونې قرارداد مشرتابه کمېټې اوومه ناسته وشوه
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي؛ او د افغانستان لپاره د اروپایي ټولنې سفیر ښاغلي پییر مایډون، په ګډه مشرۍ د لړم میاشتې په ۲۹ مه نېټه د افغانستان حکومت او اروپایي ټولنې ترمنځ د دولت جوړونې قرارداد (SRBC) مشرتابه کمېټې اوومه ناسته په مالیې وزارت کې جوړه شوه.
په دې ناسته کې چې د حکومت بېلابېلو ادارو استازو او مسؤلینو ګډون کړی وو، د دولت جوړونې قراردادونو د شاخصونو په پرمختګ، شته ستونزو او خنډونو په موندلو، بودیجوي اصلاحاتو، د مالي کړنو مدیریت سیستم په پياوړي کولو، د ارزښت په زیاتوالې مالیې په پېژندنه، د عامه خدمتونو وړاندي کولو په برخه کې د ریفورم په پرمختګ، د ولسي تړون له لارې د پروژو په پلي کولو، کلیو او بانډو ته د خدمتونو په وړاندي کولو، د کار د قوانینو په اصلاح کولو او یو شمېر نورو اړوندو مسایلو په تړاو د نظرونو څرګندونې وشوې.
همدا شان، د حکومت بېلابېلو ادارو د خپلو لاسته راوړنو او فعالیتونو په هکله ګډونوالو ته د پرېزینټېشن له لارې معلومات وړاندې کړل.
د ناستې په پای کې د اروپایي ټولنې استازو، د دولتي ادارو د اجراآتو راپور له قناعته وروسته، د دولت جوړونې قرارداد د ژمنو پلي کولو په پرمختګ خوښي څرګنده کړه او ژمنه یې وکړه، چې د افغانستان د بودیجې د تمویل په برخه کې به د دوی همکاري دوامداره وي او خپلو مرستو ته به د دې ژمنو د تحقق په لاره کې دوامداره کړي.
