د مالیې وزارت سرپرست د افغانستان خوندي سندونو چاپولو شرکت لوی ریاست له سرپرست سره د دې شرکت په کاري پرمختګ خبرې وکړې
د مالیې وزارت سرپرست او د زېربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د کب میاشتې په ۲۰ مه نېټه د افغانستان خوندي سندونو چاپولو شرکت لوی ریاست له سرپرست ښاغلي جمال رحمن، سره وکتل.
په دې لیدنه کې چې د دې برخې ستر تخنیکي سلاکار ښاغلي ولید هویدا، هم حضور درلود، لومړی د مالیې وزارت سرپرست وویل، چې د خوندي سندونو پروژه په هیواد کې اړینه پروژه ده او موږ غواړو؛ چې خوندي سندونه د افغانستان دننه چاپ شي. نوموړی په دې برخه کې د کار د پرمختګ راپور غوښتونکی شو.
د افغانستان د خوندي سندونو شرکت لوی ریاست سرپرست وویل؛ هغه دوه ودانۍ چې په دې برخه کې ودانېږي، یوه یې بشپړه شوې؛ ماشینونه یې هیواد ته را رسېدلي دي او د نصبېدو په حال کې دي او دا رنګه به د روان کال په بله ربعه کې د ازمایښتي چاپ چارې پیل کړي. د دویمې ودانۍ جوړېدو چارې چې د بنائي ودانیز شرکت ته سپارل شوې دي لږ ځنډنۍ شوې دي.
د مالیې وزارت سرپرست سپارښتنه وکړه، څو په راتلونکي اوونۍ کې د چارو ادارې له عملیاتي ادارې او بنائي ودانیز شرکت سره ژر خبرې وشي، څو له منظم پلان او مهال وېش سره سم د دې ودانۍ چارې په ټاکلې موده کې بشپړې شي. نوموړي زیاته کړه، چې جرمني هیواد د دې پروژې ملاتړ او څارنه کوي، کارونه یې باید ځنډني نه شي.
