د مالیې وزارت سرپرست د منځنۍ اسیا او منځني ختیځ لپاره د اسیا پراختیایي بانک له عمومي رئیس سره د پېژندنې ناسته وکړه
د مالیې وزارت سرپرست محمد خالد پاینده، د منځنۍ اسیا او منځني ختیځ لپاره د اسیا پراختیایي بانک له عمومي رئیس یوګین ژوکوف، سره د ویډیو کنفرانس له لارې لیدنه او د پېژندنې ناسته وکړه.
په دې لیدنه کې چې د افغانستان لپاره د اسیا پراختیایي بانک رئیس نریندرا سنګرو، هم ګډون کړی وو، په پیل کې د ماليې وزارت سرپرست نوموړي ته د ورسپارل شوې مسؤلیت مبارکي ورکړه او په چارو کې یې د بریالیتوب غوښتونکی شو.
همدا شان دواړو لوریو د زېربنا، انرژۍ، او ټرانسپورټ سکټورونو په برخه کې د اسیا پراختیایي بانک له لوري د تمویلوونکو پروژو، د یادو پروژو د کاري بهیر چټکېدو لپاره د افغانستان د ملاتړ، په افغانستان کې د اسیا پراختیایي بانک له پروژو څخه د دې بانک د ملاتړ اعلانولو، د مالیې وزارت او یاد بانک ترمنځ د همکارۍ او همغږۍ په ډېرېدو او یو شمېر نورو اړوندو مسایلو په تړاو خبرې او د نظرونو تبادله وکړه.
