د ګمرکونو لوی رئیس د کندهار ولایت له یو شمېر سوداګرو سره وکتل
د ګمرکونو لوی رئیس ښاغلي مفتي عبدالمتین سعید چي د کندهار ګمرک د ارزوني په موخه یاد ولایت ته په رسمي سفر تللی، تېره ورځ یې د کندهار ولایت د سوداګریزو شرکتونو د بېلابیلو اتحادیو له استازو سره د یاد ولایت د سوداګرۍ په خونه کي وکتل.
په کتنه کي د رئیس الوزرا د اقتصادي مرستیال سلاکار ښاغلي حاجي ابراهیم حکمت هم شتون درلود، په پیل کي د کندهار ولایت د سوداګرۍ خونې رئیس ښاغلي محمد صدیق مهمند راغلي پلاوي ته د ښه راغلاست او یاد ولایت ته د راتګ څخه د منني تر څنګ وویل: د ا.ا.ا په راتګ سره په ګمرکونو کي فساد له منځه تللی او ګمرکي طی مراحل اسانه سوي دي. نوموړي زیاته کړه چي اوس مهال د سوداګرو ستونزو ته پر خپل سره رسیدنه کیږي.
د رئیس الوزرا د اقتصادي مرستیال سلاکار وویل: کندهار ولایت ته زموږ د راتګ موخه داده چي د سوداګرو ستونزي واورو او له دوی څخه یي غوښتنه وکړه چي شته ستونزي له راغلي پلاوي سره شریکی کړي.
د کندهار ولایت سوداګرو په خپل وار سره په ګمرکونو کي شته ستونزي له راغلي پلاوي سره شریکي کړې او د حل غوښتنه یې وکړه، د ناستي په پای کي د ګمرکونو لوی رئیس د کندهار ولایت د سوداګرو اکثره ستونزي حل کړې او په اړه ئې د کندهار ګمرک مسؤلینو ته لازم هدایات ورکړل. همداشان نوموړي وویل چي ځیني پاته ستونزي به د حل په موخه د مالیې وزارت له مشرتابه سره شریکي کړي.
