د مالیې وزارت سرپرست او د افغانستان لپاره د قزاقستان جمهوریت سفیر د سوداګریزو او اقتصادي همکاریو د ټینګښت او پراختیا په تړاو خبرې وکړې
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي ډاکټر محمد همایون قیومي، د کب میاشتې په ۱۹ مه نېټه په افغانستان کې د قزاقستان له سفیر ښاغلي حلیم خان یسین ګیلدیوف، سره وکتل.
په دې لیدنه کې دواړو لوریو د دوه اړخیزه اقتصادي او سوداګریزو همکاریو په ټینګښت او پراختیا، د دواړو هیوادونو ترمنځ د اقتصادي او سوداګریزو ناستو لسم پروتوکول په پلي کېدو، د افغاني او قزاقي شرکتونو له لوري د خواف – هرات څلورمې قطعې رېل پټلۍ په جوړېدو، د ګمرکي دوه اړخیزه همکاریو او د ګمرکي اطلاعاتو د تبادلې په په هوکړه لیکونو، د انرژۍ پروژو په برخه کې د قزاقي پانګوالو په پانګونې او یو شمېر نورو اړوندو مسائلو په تړاو خبرې وکړې.
قزاقستان اړخ ژمنه وکړه، څو د ګمرکي هوکړه لیک او ګمرکي اطلاعاتو تبادلې مسودې اسناد وروستي کړي چې د دواړو لوريو لاسلیک ته چمتو شي.
