د مالیې وزارت سرپرست: افغانستان د چاپېریال په ککړتیا کې تقریبآ رول نه لري
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د نړیوال بانک او پیسو نړیوال صندوق ۲۰۱۹ کال پسرلنۍ ناستو کې د ګډون په مهال د څنډو ناستې په دوام د وري میاشتې په ۲۳ مه نېټه د چاپېریال ساتنې په پنل کې ګډون وکړ.
په دې پنل کې د هیمالیا یخچالونو د اوبه کېدو او په اقتصاد یې د بد اغېز، طبیعي پېښو، د سویلي او ختیزې اسیا هیوادونو د اوبو په کمښت، له دې کړکېچه د وتلو په لارو چارو خبرې او د نظرونو تبادله وشوه او د ګډونوالو پوښتنو ته ځوابونه ورکړل شول.
د مالیې وزارت سرپرست یادونه وکړه، چې افغانستان د چاپېریال ساتنې په تخریب کې لږ رول لري خو له دې اړخه زیات ځپل کېږي، نوموړي د نړۍ له هیوادونو وغوښتل څو په دې کړکېچ باندي د برلاسي کېدو لپاره چې افغانستان ته یې هم زیان اړولی له دې هیواد سره مرسته وکړي.
