د ملت سوداګریز مارکېټ رغنیزي چاري په چټکۍ رواني دي!
د چنګاښ۹مه ۱۴۰۴هـ.ل
د مالیې وزارت اړوند د ملت په نوم سوداګریز مارکېټ، چي د کابل ښار په درېیمه ناحیه (میرویس میدان) سیمه کي موقعیت لري او تړون ئې د عامه او خصوصي مشارکت له لاري د مالیې وزارت او کمال ظفر کمپنیو ګروپ ترمنځ په (۱۴/۹/۱۴۴۵ هـ.ق) نېټه لاسلیک سوی وو، د (۳۲۳،۶۴۷،۸۲۰) افغانیو په پانګونه په (۱۳۶۷،۷) متره مربع ځمکه باندي د (۱۲) پوړونو په درلودلو سره په عصري او معیاري بڼه ودانېږي.
د یادي ودانۍ رغنیزي چاري به په درېيو کلونو کي بشپړي سي، چي د نا خالص عوایدو (۴۰) سلنه ونډه ئې د امارت او (۶۰)سلنه ئې ودانیز شرکت ته په پام کي نیول سوې ده.
دغه ستر سوداګریز مارکېټ د (۵۰۰) دوکانونو، د موټرونو د (۳) پوړیزه تمځای، رسټورانټ، جومات او مېلمستون درلودونکی دئ، چي له ودانولو سره به ئې ګڼو هیوادوالو ته د کار زمینه هم برابره سي.
د یادوني وړ ده، چي د یادي پروژې رغنیزي چاري د ځینو خنډونو له امله ځنډېدلي وې، چي د امارتي املاکو لوی ریاست په هڅو ئې ټولي ستونزي حل او دم ګړۍ ئې چاري په چټکۍ سره رواني دي.
