د مالیې وزارت سرپرست د افغانستان لپاره د پاکستان له سفیر سره په یو شمېر دو اړخیزو اقتصادي او سوداګریزو مسایلو خبرې وکړې
د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د چنګاښ میاشتې په ۱۱ مه نېټه د افغانستان لپاره د پاکستان هیواد له سفیر ښاغلي زاهد نصرالله خان سره په خپل کاري دفتر کې وکتل.
په دې کتنه کې د پاکستان سفیر په پلازمېنه کابل کې د تېرې ورځې تروریستي پیښې په اړه چې یو شمېر افغانان په کې شهیدان او ټپیان شول، غمشریکي وښوده، دواړو لوریو د هغو موضوعاتو په اړه چې پاکستان ته د جلالتمآب ولسمشر د سفر پر مهال مطرح شوي وو لکه د واګه بندر له لارې د افغانستان د سوداګریزو اقلامو او تراتزیټي کالیو په صادرلو او سوداګرۍ، د افغانستان له لارې د انرژۍ په لیږدولو، افغان زده کړیالانو ته د تحصیلي بورسیو په ورکړې، د نساجي صنعت په برخه کې د پاکستان هیواد په پانګه ونې، ګمرکي مسایلو او یو شمېر نورو اړوندو مسایلو بحث او د نظرونو تبادله وکړه.
د مالیې وزارت سرپرست د پاکستان لوري ته یادونه کړه چې زموږ د تورخم او سپین بولدک ګمرکونه ۲۴ ساغته فعالیت ته چمتو دي، د پاکستان له لوري څخه یې غوښتنه وکړه چې ملي سوداګرو او مسافرینو ته د اسانتیاوو برابرولو په موخه دې د افغانستان په شان ګمرکي فعالیتونه ۲۴ ساعته کړي.
په پای کې پریکړه وشوه چې د اړوندو ادارو په ګډون دې په کابل او اسلام اباد کې دوه تخنیکي ناستې جوړې شي تر څو د جلالتمآب ولسمشر د سفر یاد شويو مسایلو باندې تخنیکي بحثونه وشي او د عملي کولو لپاره یې لازم اقدامات تر سره شي.
