افغانستان او ګرجستان د ګمرکونو عصري کولو او پراختیا او د ګمرکي چارو دوه اړخیزه اداري همکاریو په برخه کې دوه هوکړه لیکونه لاسلیک کړل
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د چنګاښ میاشتې په ۲۴ مه نېټه د یوه لوړ پوړي پلاوي په مشرۍ ګرجستان هیواد ته سفر وکړ. د دې سفر په مهال د ګرجستان هیواد د ګمرکي توکو د ترخیص پروسو او ترافیکو د ثبت ادارې د لیدو تر څنګ، له ګرجستان سره یې د ګمرکونو عصري کولو او پراختیا او د ګمرکي چارو دوه اړخیزه اداري همکاریو په برخه کې دوه هوکړه لیکونه هم لاسلیک کړل.
له لاسلیک شویو هوکړه لیکونو، څخه موخه د سرحدي او محصولي ګمرکونو عصري کول، د افغانستان د ګمرکونو زیربناء پراختیا، د افغانستان په سرحدي او محصولي ګمرکونو کې د پرمختللو سیستمونو تطبیقول، د کورنیو سرحدي ګمرکونو د زیربناو په تړاو د مشورو وړاندې کول، د ګمرکي پروسو معیاري کولو په برخه کې د ګرجستان همکارۍ، د دواړو لوریو ترمنځ د ګمرکي پروسو همغږي کول، د ګمرکونو په برخه کې د علمي او تخصصي تجربو او ګمرکي اطلاعاتو راکړه ورکړه، د ګرجستان له لوري د افغانستان د ګمرکي کارکوونکو وړتیا لوړول او د افغانستان د ګمرکونو او مالیو ملي اکاډمۍ د تعلیمي نصاب بیا کتنه ده.
د یادونې وړده، چې د افغانستان او ګرجستان تر منځ یاد لاسلیک شوي هوکړه لیکونه د سوداګرۍ اسانتیاو او ګمرکي کنټرول په موخه لاسلیک شوي دي.
