د مالیې وزارت سرپرست د کندهار ولایت د پراختیایي پروژو په پلي کیدو ټینګار وکړ
د مالیې وزارت سرپرست او په زېربناء چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، نن د زمرې میاشتې په ۲ نېټه د کندهار له والي ښاغلي حیات الله حیات، سره د خپل کار په دفتر کې وکتل.
دواړو لوریو د لیدنې په مهال په کندهار ولایت کې د پراختیایي پروژو د بهیر په چټکېدو، د دې ولایت د بودیجې د ستونزو په حل لارو، د ۱۳۹۹ مالي کال لپاره د دې ولایت په پراختیایي پلان او د لومړیتوب لرونکو پروژو په ورګډېدو، د ارغنداب او خاکرېز ولسوالیو د سړک په جوړېدو، د کندهار ښاروالۍ له لوري د ۰.۴ سلنې فیس په راټولېدو او له دې لارې خلکو ته اسانتیاو په رامنځته کیدو، د کندهار له ښار څخه سپین بولدک ته د ګمرک په لېږد، په چټکۍ سره د ډالې بند د پروژې په پلي کېدو او یو شمېر نورو ورته مسایلو په تړاو خبرې وکړې.
