عبدالولید تمیم د مالیې وزارت د عوایدو او ګمرکونو معینیت د سرپرست په توګه وټاکل شو
ښاغلی عبدالولید تمیم په هندوستان کې د افغانستان سفیر په توګه بهرنیو چارو وزارت ته له کوربه هیواد څخه د باور لیک تر را رسیدو پورې، د مالیې وزارت په وړاندیز او د ولسمشرۍ عالي مقام د حکم له مخې د عوایدو او ګمرکونو معینیت د سرپرست په توګه ټاکل شوی نن د زمري میاشتې په ۳مه نېټه د مالیې وزارت سرپرست او د زیربناء په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، له لوري د یاد معینیت کارکوونکو ته ور وپیژندل شو.
د مالیې وزارت سرپرست د عوایدو او ګمرکونو معینیت د نوي سرپرست په پیژندغونډه کې وویل:" د ښاغلي عبدالله رقیبي د کړنو او فعالیتونو څخه چې په یو حساس وخت کې یې د عوایدو او ګمرکونو مسؤلیت په غاړه واخیست او د مالیې وزارت له رهبرۍ سره یې په صادقانه ډول دنده تر سره کړه مننه کوم، همدا رنګه ښاغلي عبدالولید تمیم ته د عوایدو او ګمرکونو د سرپرست په توګه مبارکي وایم او له نوموړي څخه غواړم چې د ملي عوایدو په راټولیدو کې پوره هڅه وکړي."
د مالیې وزارت سرپرست ټولو اړوندو کارکوونکو ته هدایت ورکړ چې له نوي ټاکل شوي معین سره هر اړخیزه همکاري وکړي.
د مالیې وزارت د عوایدو او ګمرکونو پخواني معین ښاغلي عبدالله رقیبي د حکومت او مالیې وزارت د رهبرۍ له باور څخه د مننې تر څنګ وویل چې د خپل ماموریت په دوره کې یې ځینې اصلاحات پلي کړي دي او اړتیا شته چې نور اصلاحات هم پلي شي.
د عوایدو او ګمرکونو معینیت نوي سرپرست د حکومت او مالیې وزارت له باور څخه مننه وکړه او په حکومت او خصوصي سکټور کې یې د خپلو تجربو څخه یادونه وکړه. ښاغلي تمیم وویل چې هڅه کوي اړوندې چارې په پوره صداقت سره تر سره کړي. نوموړي ټینګار وکړ چې له خپلو همکارانو څخه به ملاتړ کوي او له همکارانو څخه یې وغوښتل چې له ده سره په پوره صداقت او ایماندارۍ کار وکړي.
