د مالیې وزارت سرپرست د ۱۳۹۸ مالي کال ملي بودیجې د منځني کال د بررسۍ په موخه د ولسي جرګې د مالي او بودجې او د ولسی جرګې د مختلفو کمیسیونو د استازو سره وکتل
د مالیې وزارت سرپرست او د زېربناء چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي، د زمري میاشتې په ۸ مه نېټه د ۱۳۹۸ مالي کال ملي بودیجې د منځني کال د بررسۍ په موخه د ولسي جرګې له غړو سره وکتل.
د ولسي جرګې له مالي او بودیجوي کمېسیون سره په ناسته کې دواړو لوریو ټینګار وکړ، چې د یوې ملې، رڼې او اغېزمنې بودیجې لرلو لپاره د مالیې وزارت او ولسي جرګې ترمنځ لازمه همکاري او همغږي شتون لري او باید دا بهیر اوږدمهاله پاتي شي.
همدا شان د ولسي جرګې له غړو سره په جلا ناستو کې، د مالیې وزارت سرپرست هغوی ته د منځني کال په بررسۍ کې په عادي او پراختیایي بودیجه کې د بدلونو راوستو په هکله معلومات ورکړل.
د مالیې وزارت سرپرست د ولسي جرګې استازو ته ډاډ ورکړ، چې ستاسو نظرونه او وړاندیزونه به د هیواد نافذه قوانینو په رڼا او امکاناتو ته په کتو سره د ملي بودیجې په سند کې په پام کې ونیول شي.
په دې سربېره، په جلا ناسته کې د ولسي جرګې د مالي او بودیجوي کمېسیون له رئیس ښاغلي محمد عظیم محسني، سره د لیدنې پرمهال دواړو لوریو د ولسي جرګې په مرسته په مالي سکټور کې د اصلاحاتو په پلي کولو او د دې بهیر په دوام، د ملي بودیجې په سند کې د هغو پروژو په ورګډولو چې د افغانستان له اقتصادي ځان بسیاینې سره مرسته کوي، د حکومت له کړنو د ولسي جرګې په قانوني څارنه او نورو اړوندو مسایلو په تړاو بحث او د نظرونو تبادله وکړه.
د ولسي جرګې مالي او بودیجوي کمېسیون رئیس وویل، چې د حکومت له کړنو څارنه د ولسي جرګې قانوني صلاحیت دی او ټینګار یې وکړ، چې په دې لاره کې به له حکومت سره مرسته کوي.
