افغان کارټ دولتي شرکت روسیې ته د انارو صادرات پيل کړل
د افغان کارټ دولتي شرکت له دېرش کلن ځنډ وروسته د لومړي ځل لپاره روسیې ته د انارو صادرات پيل کړل. د صادراتو لړۍ پیلېدو په مراسمو کي د افغان کارټ دولتي شرکت رئيس سيد محمد قسیم او د اړوندو ادارو یو شمېر مسؤلینو ګډون کړی وو.
د دې مراسمو د پیل په وینا کي ښاغلي سيد محمد قسیم وویل: دغه شرکت تردې وړاندي د بېلابېلو لاملونو له کبله فلج سوی وو او تېره ورځ يې یو ځل بیا خپل فعالیت پېل کړ، چي له دېرش کلن ځنډ وروسته يې د لومړي ځل لپاره روسیې هيواد ته د انارو صادرات پيل کړل، د انارو دغه محموله شل ټنه ده او هڅه کوي په دې برخه کي سوداګري نوره هم پراخه کړي، چي ډېر ژر به د همدې شرکت پرمټ له روسیې څخه د غنمو، تيلو او نورو توکو صادرات پېل سي.
د يادونې وړ ده، چي تردې وړاندي له کندهار څخه تازه انار پاکستان او نورو ګاونډیو هيوادونو ته صادرېدل چي ډیر کله به یادو هیوادونو د افغان صادراتو پر وړاندي ستونزي جوړولې او د تجارانو مالونه به پر وخت بازار ته نه رسېدل.
