د امريکا کانګريس ته د سيګار له خوا د نوي وړاندي سوي راپور په اړه د ماليې وزارت اعلاميه
د افغانستان لپاره د امريکا متحده ايالتونو ځانګړي پلټونکي ادارې (سيګار) د امريکا کانګريس ته په خپل ربعوار راپور(۳۰/۱/۲۰۲۳) کي ادعا کړې، چي د اسلامي امارت په افغانستان کي له هغه انجوګانو او بنسټونو څخه، چي د بشردوستانه مرستو په برخه کي کار کوي د لايسنس فيس، مالياتو او اداري لګښتونو په نوم پيسې ترلاسه کوي، چي د دوی د عوايدو ستره برخه جوړوي.
د افغانستان اسلامي امارت د ماليې وزارت د سيګار دغه راپور د حقيقت څخه لېري بولي او په کلکه ئې ردوي.
د ماليې وزارت ټولو هغه انجوګانو او بنسټونو ته، چي د بشردوستانه مرستو په برخه کي فعاليت کوي، مالياتي معافيت ورکړی دئ، چي نه ماليه ورڅخه اخلي او نه هم کوم اداري مصارف ورڅخه وضع کېږي، همدارنګه په ټولو ګمرکونو کي د همدې انجوګانو او بنسټونو د توکو پر واردولو، ټولي ګمرکي تعارفې صفر دي او بېله کوم محصول څخه ددې بنسټونو توکي هيواد ته داخلېږي.
له بهرنيو انجوګانو او بنسټونو څخه يوازي د لايسنس فيس اخيستل کېږي، چي په ډېره لږه کچه پيسې دي او يو قانوني چوکاټ لري، چي له نورو هيوادونو سره په انډول کي دئ او د افغانستان پر ملي عوايدو باندي هيڅ کوم اثر نه لري.
د يادوني وړ ده، چي د ماليې وزارت په شمول د اسلامي امارت ټول ارګانونه هر هغه انجو او بنسټ ته، چي د بشردوستانه مرستو په برخه کي فعاليت کوي اداري، مالي او امنيتي سهولتونه ايجاد کړي او په دې برخه کي خپلو ټولو وعدو ته ژمن دي او د بشري مرستو په وېش او رسونه کي له دوی سره همکاره دي.
