د مالیې وزارت د دعوت او ارشاد رياست د دغه وزارت له کارکوونکو څخه د عقیدتي درسونو ازموینه واخیسته!
د افغانستان اسلامي امارت د امربالمعروف، نهي عن المنکر او شکایتونو اورېدلو وزارت، د دعوت او ارشاد د چارو د انسجام لوی ریاست د حکم پر بنسټ؛ د ماليې وزارت د دعوت او ارشاد ریاست د دغه وزارت له کارکوونکو څخه د عقايدو او طهارت په برخو کي ازموینه واخیسته.
په دغي تحریري ازموینه کي، چي د مالیې وزارت په جومات کي واخیستل سوه، د وزارت د مرکزي ریاستونو ټولو کارکوونکو ګډون کړی وو.
د ازمویني موخه د اوامرو اطاعت، ديني چارو ته د کارکوونکو هڅول او د الهي قوانینو پلي کول ول؛ ترڅو په فکري او عقیدتي بډايني سره د پردیو د کلتوري يرغل مخه ونيول سي.
د دعوت او ارشاد رياست مسؤلينو، چي د ازمویني له بهير څخه ئې څارنه کوله، له کارکوونکو څخه ئې د جماعت لمانځه، عقیدتي او ديني درسونو ته د حاضرېدو او له اسلامي شريعت سره سم د خپل سیرت او صورت جوړولو له امله مننه وکړه او زیاته ئې کړه، چي د دغه آزمویني پايلي به ډیر ژر اعلان سي.
د یادوني وړ ده، چي د مالیې وزارت د ګمرکونو او عوایدو د لویو ریاستونو او همدا رنګه د وزارت له خدماتي کارکوونکو څخه به په راتلونکې اونۍ کي ازموینه واخیستل سي.
