د مالیې وزارت مسئولینو د جغرافیوي معلوماتو او مصنوعي ځيرکتيا د حللارو په آنلاین ورکشاپ کي ګډون وکړ!

چهارشنبه د کب ۱۵مه ۱۴۰۳ هـ.ل

د ملګرو ملتونو سازمان د پایداره پرمختګ حل لارو ادارې (SDSN) له لوري د نړۍ د ماليې او پلان وزارتونو له پاره د جغرافیوي معلوماتو (GIS) او مصنوعي ځيرکتيا (AI) د حل لارو په تړاو د لوړ پوړو غړو ورکشاپ پر لیکه (آنلاین) بڼه ترسره سو.
دغه ورکشاپ کي د نړۍ د بېلابېلو هیوادونو استازو ګډون درلود، چي له افغانستان څخه د مالیې وزارت د عوايدو لوی رياست مسئولینو برخه اخیستې وه. یاد ورکشاپ د (جغرافیوي معلوماتو او مصنوعي ځيرکتيا حللاري) تر عنوان لاندي د پایداره پرمختګ له پاره د مالي سیسټمونو تقویت ته ځانګړی سوی وو.
د یاد ورکشاپ په لړ کي ګډونوالو ته د جغرافیوي معلوماتو، لیري سنجوني، د سپوږمکۍ د انځورونو او د جغرافیوي مصنوعي ځیرکتيا (GEOAI) د عملي کاروني مهمي وسیلې او د اطلاعاتو پر بنسټ د تصمیم نیولو اسانتیا، د مالي پلان جوړونې له پاره د جغرافیوي معلوماتو اهمیت، د اسانه پرېکړو نیولو له پاره د مصنوعي ځيرکتيا کارولو، د مختلفو هیوادونو تجربې او بریالیتوبونه، د مالي ستراتیژیو پیاوړتیا او پایداره تمویل او یو شمېر نورو اړوندو مهمو موضوعات په تړاو د نظرونو تبادله ترسره سوه.
په ټوله کي دغه ورکشاپ یو بریالی ګام وو، چي د (Geospatial او AI) حل لارو په تړاو پراخ نظرونه پکي وړاندي سول او ګډونوالو ته د عصري ټکنالوژۍ د عملي استفادې نوي لاري وښودل سوې، چي دا به د پایدار پرمختګ، له اقليمي بدلون سره د مقابلې او د معلوماتو پر بنسټ د پياوړو مالي پلانونو په جوړولو کي مرسته وکړي.