په عامه لګښتونو کې د سپما په تړاو د مالیې وزارت او یو شمېر دولتي ادارو ترمنځ ګډه ناسته وشوه
د مالیې وزارت مالي معینیت ستر سلاکار او د عامه لګښتونو او امنیتي سکټور د بیا کتنې واحد مسؤل ښاغلي فضل وهاب ممتاز په مشرۍ، په عامه لګښتونو کې د سپما په تړاو د نړیوال بانک د استازي په حضور کې د مالیې وزارت او یو شمېر دولتي ادارو ترمنځ ګډه ناسته نن د لېندۍ میاشتې په ۵ مه نېټه د دې وزارت په خیبر هال کې ترسره شوه.
په دې ناسته په عادي بودیجه کې د غیر اړینو لګښتونو په سپما، د ادارو د تشکیلاتو او معاشونو په تنظیم، د ادارو ترمنځ د لا همغږۍ په رامنځته کېدو، مالي مسایلو، خلکو ته د غوره خدمتونو په وړاندي کولو او یو شمېر نورو اړوندو مسایلو په تړاو خبرې او د نظرونو تبادله وشوه.
د ناستې په پرانیستې وینا کې ښاغلي فضل وهاب ممتاز، په عامه لګښتونو کې د سپما او غیر اړینو لګښتونو د یادونې ترڅنګ وویل، چې زموږ هدف له ټولو ادارو سره په ګډه د تشکیلاتو او معاشونو تنظیم او په راتلونکي کې د بودیجې د کسر مخنیوی او د عامه لګښتونو بیا کتنه ده. موږ غواړو بودیجه په ښه او رڼه توګه مصرف کړو.
په دې ناسته کې ګډونوالو په خپل وار سره خپل نظرونه او وړاندیزونه شریک کړل او ترڅنګ یې ګډونوالو ته د مالیې وزارت د همکارانو له لوري هم معلوماتي پریزینټېشن وړاندي شو.
