د افغانستان د ګمرکونو او د جورجیا د عوایدو او ګمرکونو ادارې ترمنځ تخنیکي مشورتي ناسته وشوه

د افغانستان د ګمرکونو پلاوي، د جورجیا هیواد د عوایدو او ګمرکونو ادارې، د ګمرکونو نړیوال سازمان (WCO) او د امریکا متحده ایالاتونو سازمان (CLDP) د مسؤلینو په ګډون نن د غبرګولې میاشتې په ۲۷ مه نېټه  د افغانستان د ګمرکونو او د جورجیا هیواد د عوایدو او ګمرکونو ادارې ترمنځ تخنیکي مشورتي ناسته د ګرجستان په پلازمېنه تبیلیسي ښار کې وشوه.

په دې ناسته کې د افغانستان له لوري له تشریفاتي وینا وروسته، د ګمرکونو په برخه کې د افغانستان په لاسته راوړنو، د دوو راتلونکو کلونو لپاره د هیواد د ګمرکونو په پلان، د ګمرکونو په ستراتېژیک پلان، له فساد سره په مبارزه او د ښې روڼتیا په تامینولو، له برېښنایي سیستم څخه د اغېزمنې ګټې اخیستنې، د سوداګرۍ اسانتیاوو او د هیواد د ګمرکي سرحدونو په جوړونه، د ګمرکونو په برخه کې د جورجیا هیواد په تخنیکي مرستو او نورو اړوندو مسایلو په تړاو هر اړخیز بحث او د نظرونو تبادله وشوه.

ورپسې د جورجیا د عوایدو او ګمرکونو مسؤلینو د افغانستان له لوري د ذکر شویو مواردو په برخه کې د تجربو په اړه معلومات وړاندي کړل او له افغانستان سره یې د تخنیکي همکاریو او تجربو شریکولو ته چمتووالی وښود. همدا راز د ګمرکونو نړیوال سازمان د افغانستان ګمرکونو ته د دې بنسټ له لوري د تخنیکي او تعلیمي همکاریو په برخه کې ډاډ ورکړ.

د یادونې وړده، چې یاده ناسته به د ګورجستان هیواد په پلازمېنه تبیلیسي ښار کې تر څلورو ورځو دوام ولري او د دې ناستې په پای کې به د افغانستان او ګرجستان تر منځ د تخنیکي همکاریو دوه اړخیزه هوکړه لیک هم لاسلیک شي.