د اړوندو ادارو او مرسته کوونکو ترمنځ د کرونا ویروس خپرېدو د مخنیوي په موخه تعقیبي ناسته وشوه
د مالیې وزارت سرپرست او د زېربنا په چارو کې د ولسمشرۍ عالي مقام ستر سلاکار ښاغلي پروفیسور محمد همایون قیومي په مشرۍ د کب میاشتې په ۲۱ مه نېټه د اړوندو ادارو او مرسته کوونکو ترمنځ د کرونا ویروس خپرېدو د مخنیوي په موخه تعقیبي ناسته وشوه.
په دې ناسته کې چې د اړوندو ادارو مرستیالانو او مسؤلینو، نړیوال بانک د اسیا پراختیایي بانک او د روغتیا نړیوال سازمان ګډون کړی وو، لومړی د عامې روغتیا وزارت، په افغانستان کې د کرونا ویروس له کبله د موجوده وضعیت او مالي او تخنیکي اړتیاوو په تړاو د ناستې ګډونوالو ته پریزینټېشن وړاندې کړ.
د ارشاد، حج او اوقافو او اطلاعاتو او کلتور وزارتونو د کرونا ویروس خپرېدو او مخنیوي په برخه کې د عامه پوهاوي خپرولو ته چمتو والی وښود او زیاته یې کړه، چې د جوماتونو او د هیواد د رسنیو له لارې به خلکو ته اړین پوهاوی ورکړي.
همدا شان د افغانستان مرسته کوونکو په هیواد کې د کرونا ویروس د خپرېدو د مخنیوي لپاره د هر ډول مالي او تخنیکي مرستو چمتو کولو ډاډ ورکړ.
د مالیې وزارت سرپرست د ناستې په پای کې اړوندو ادارو ته لارښوونه وکړه، چې په اړوندو برخو کې جدی کار وکړي او راتلونکي اوونۍ کې دي ناستې ته د کاري پرمختګ راپور وړاندې کړي. همدارنګه نوموړي د عامې روغتیا وزارت او مرکزي احصایې ادارې ته هدایت ورکړ، چې د خطر سیمې، نفوس او د کرونا ویروس احتمالي ګراف مشخص کړي.
