د اړوندو اقتصادي موضوعاتو په اړه د ایران اسلامي جمهوریت د انرژۍ/نیرو له وزیر سره د مالیې وزارت سرپرست ټلیفوني خبرې
د مالیې وزارت نوماند وزیر او سرپرست ښاغلي عبدالهادي ارغندیوال، د وږې میاشتې په ۱۰ مه نېټه د ایران اسلامي جمهوریت د انرژۍ/نیرو له وزیر ښاغلي رضا اردکانیان، سره تلیفوني خبرې وکړې.
په پیل کې ښاغلي اردکانیان، په هیواد کې د وروستیو سېلابونو راوتو له کبله د مالي او ځاني زیانونو په اړه خپله خواشیني څرګنده کړه او ترڅنګ یې د مالیې وزارت سرپرست ته د مالیې وزارت د تصدۍ ورسپارلو مبارکي ورکړه.
همدا شان د خبرو پر مهال دواړو لوریو د دوه اړخیزه سوداګریز او اقتصادي کمېسیون شپږمې ناستې ته په چمتووالي خبرې وکړې، چې ټاکل شوی ده د یاد کمېسیون ناسته او د برېښنا، اوبو او فاضله اوبو په برخه کې د ایران د تولیداتو او ټکنالوژۍ نندارتون په نږدې راتلونکی کې په کابل کې ترسره شي.
د ایران اسلامي جمهوریت د انرژۍ وزیر وویل، چې که د افغانستان حکومت د مرستو غوښتونکی وي، دغه هیواد وروستیو سېلاب ځپلو ته په تخنیکي برخه کې همکاریو ته چمتو دی.
د مالیې وزارت سرپرست له ښاغلي اردکانیان څخه د مننې ترڅنګ وویل، چې موږ د دوه اړخیزه سوداګریز او اقتصادي کمېسیون شپږمې ناستې ته چمتووالی لرو، هیله ده دغه کمېسیون په ټاکلې موده ترسره شي، څو د دې کمیسیون په چوکاټ کې دوه اړخیزه ژمنې په ښه توګه پلي شي. نوموړي زیاته کړه، چې زموږ تخنیکي ډلې په دې برخه کې کار کوي او موږ خوښ یو چې په کابل کې د دغې ناستې کوربه توب کو.
د مالیې وزارت سرپرست، په هیواد کې د وروستیو سېلابونو راوتو له کبله له زیانمنو سره د ایران اسلامي جمهوریت د مرستو په اړه وویل، چې موږ به دغه موضوع د حکومت مشرتابه ته وړاندي کړو او پایله به یې له تاسو سره شریکه کړو.
