د سویلي اسیا د سیمه ایزو همکاریو سازمان یا سارک غړو هیوادونو د مالیې وزیرانو ۱۵مه ناسته وشوه
د مالیې وزارت مالي مرستیال ښاغلي عبدالحبیب ځدراڼ، د وږې میاشتې ۲۶ مه نېټه د سویلي اسیا د سیمه ایزو همکاریو سازمان یا سارک غړو هیوادونو د مالیې وزیرانو ۱۵مه ناسته کې د ویډیو کنفرانس له لارې ګډون او خبرې وکړې.
یاده ناسته چې هر کال د اسیا پراختیایي بانک کلنۍ ناستې په حاشیه کې جوړېږي، سږکال ۵۳ مه کلنۍ ناسته ترسره شوه، چې د افغانستان په استازیتوب د مالیې وزارت مالي مرستیال ښاغلي عبدالحبیب ځدراڼ، د سارک غړو هیوادونو د مالیې وزیرانو او لوړ پوړو چارواکو ګډون کړی وو.
د مالیې وزارت مالي مرستیال، د سارک غړو هیوادونو له پراختیایي صندوق څخه د مننې ترڅنګ وویل:" د سارک غړو هیوادونو د افغانستان د اقتصادي او ټولنیز پرمختګ لپاره ډېرې مرستې کړي او د سارک د پراختیایي صندوق وړیا مرستې یې د سیمه ایزې او اقتصادي همکارۍ لپاره اړینې دي. نوموړي زیاته کړه، چې یاد صندوق د کووید ۱۹ له ناروغۍ سره د مبارزې په برخه کې له افغانستان سره نږدې ۱.۵ میلیونه ډالره مرسته کړي او دا پیسې به د یوې ګډې پروژې په بڼه چې ټوله کچه یې ۷.۷ میلیونه امریکایي ډالره کیږي له هندوستان پرته د سارک په ۷ غړیو هیوادونو کې د کووید ۱۹ سره د مبارزې په برخه کې ولګول شي."
دا شان ښاغلي ځدران، د هند د لومړي وزیر ښاغلي نریندرا مودي، د هغه نوښت یادونه او مننه وکړه چې د ۲۰۲۰ کال د مارچ په ۱۵ نیټه یې د کووید ۱۹ سره د مبارزې لپاره د یوه بیړني صندوق د جوړیدو اعلان وکړ. په دې صندوق کې د ګډون لپاره افغان حکومت ۱ میلیون ډالره بیل کړل خو دا چې دا پیسې به په کومه بڼه لګول کیږي د لګښت میکانیزم یې تراوسه نه دی په ډاګه شوی، خو د هر غړي هیواد څخه د ځانګړو شویو پیسو د لګښت په برخه کې به وروستۍ پریکړه د غړیو هیوادونو د مالیې وزارتونه کوي. نوموړي، د افغانانو د خپلمنځي خبرو د پيل یادونه وکړه او د هغو بریالیتوب یې د افغانستان د سیاسي ثبات او اقتصادي ودې لپاره اړین وباله او زیاته یې کړه، چې په ۱۳۹۸ کال کې د کورنیو عوایدو کچه ۲.۷ میلیارده ډالرو ته لوړه شوه چې دا د پرځان بسیاینې په لوري د حکومت لپاره غټه لاسته راوړنه وه. د افغانستان اقتصادي وده په ۱۳۹۸ کال کې ۳ سلنه خو په ۱۳۹۹ کال کې د کووید ۱۹ ناروغۍ په راتګ او د هغې د ناوړه اقتصادي اغیز په پایله کې به دا وده ۵ سلنه راښکته شي.
هغه یادونه وکړه، چې د بیوزلۍ د کچې د راکمولو لپاره افغانستان ۸ سلنه اقتصادي ودې ته اړتیا لري او په دې برخه کې د نړیوالو پراختیایي ملګرو مرستې او ملاتړ ډیر مهم دی.
د خبرو په پای کې ښاغلي ځدراڼ، د نیپال د بهرنیو چارو له وزیر څخه چې د ننۍ غونډې مشري یې کوله او همدارنګه د اسیا د پراختیایي بانک او ټولو ګډونوالو څخه د هغوی د پرلپسې ملاتړ له کبله د زړه له کومی مننه وکړه.
